СЮСЬ ПИЛЯ

Ньӧжмыд, лажмыд Пиля
Видз вылӧ со тэрмасьӧ.
Пиля сэтшӧм зіля
Кыкнан синсӧ тільӧ.
Унмыскӧд на вермасьӧ.
Шонді моз жӧ сылӧн
Гӧрдӧдӧма бандзибыс.
Но оз ошйысь вынӧн,
Кӧть и юрыс вылын,
Ньӧти абу яндзимыс.
Йӧзыс тан и эстӧн,
Шондіыс нин зэв вылын,
Пиля пуксис ӧтнас,
Каллянӧс пӧ песта,
Мудзтысьны пӧ вевъяла.
Уджыс пуӧ-туӧ,
Вӧвдӧм косьмӧ важӧн тай.
 «Эшта», — Пиля шуӧ,
Нопсӧ чӧвтіс муӧ, — 
Дасьсорысь пӧ пажнайта.
Веж ру кайӧ мусьыс.
Тӧвру мыйкӧ вашкӧдӧ.
Кор нин сёйсис-юсис,
Пилялӧн и шусис:
«Нёровтчыла, гашкӧ да?»
Пиля вӧйтчис унмӧ,
Видз пасьтаыс шкоркнитіс...
Кадыс зарни лунӧ
Нӧшта ӧдйӧн мунӧ:
Оз ӧд узь пӧсь шондіыс.
Кватитчисны ёртъясыс:
«Кӧн тэ, Пиля? Шыась кӧть...»
«Ачыс асьсӧ ордъяс»...
«Кодкӧ со, кыдз бордъяс,
Шевгӧдӧма кияссӧ»...
Локтісны, а зонмыс
Узьӧ ыджыд ныргорӧн.
Шыгыртісны, ёнӧсь,
Лэптісны — да, тонӧсь
Вайӧдісны кыр дорӧ.
«Душ пӧ колӧ, вӧлӧм,
Лун шӧр лунын узьысьлы.
Бурмӧдам нӧ сьӧлӧм...»
Тыас, быттьӧ тӧлӧн,
Кокньыдика вувзисны.
Равӧстіс тай Пиля,
Оз тӧд, кыті-й петнысӧ.
Кослань ырзьӧ. Выльӧн
Кыкнан синсӧ тільӧ.
Чайтӧ, гашкӧ, вӧтнас на.
Шыасисны вывсянь:
«Паськӧмнад, ёрт, келӧдім!
Наянлуннад кывсян — 
Со тэн и пӧсь пывсян.
Дорын узьны велӧдім.
Оз-ӧ, зонмӧ, кынты?
Миянысь он сайӧдчы.
Уджйӧзтӧ вай мынты — 
Уджын личӧд вынтӧ.
Сэк и мортӧ вайӧдчан!»