ТУВСОВ СЕРПАС

Кыдз бур кӧзяин, муяс вылӧ
Выль трактор петіс югдандор.
Пӧсь бокъяс тіралӧны сылӧн.
Оз кӧсйы ланьтлыны мотор.
Мотор и збыльысь, вӧлӧм, варов —
Сьӧд мулы вайис сымда висьт!
Мед няньлы вундысь радлӧ арын,
А ӧні радлӧ тракторист.
Ӧд сійӧ лэптӧ тувсов гыяс
Тан, садьмӧм ыбын. Лэчыд тӧв
Дась разӧдлыны татчӧс шыяс
Свет пасьта. Аслыс любӧ зэв
Бур сёрни кыны мукӧд, вакӧд.
Оз тыдав ыблӧн дор ни пом.
И ветлӧ бӧрӧздаӧд рака,
Кыдз быттьӧ главнӧй агроном.