СЬЫЛӦМ

Енэж дорыс кыа-шӧвкӧн вӧччис.
Пароходлӧн нормыштіс свисток.
Мунісны война вылӧ боецъяс,
Сьылісны, мед пӧдас ыджыд шог.
Сьылӧм налӧн кывтіс лӧз ю весьтті,
Сиктӧ пырис асыв — пӧсь да чож.
Кыа мулысь радейтӧмсӧ пестіс.
Войвыв мулӧн садьмис быд туй вож.
Гырысьяскӧд сулалі кыр йылын.
Ачым весиг кыв ни джын эг шу.
Сӧмын дзорги, сӧмын кывзі сьылӧм,
Кытчӧдз сійӧс пароход эз ну.
Мунісны землякъяс. Налӧн сэсся
Сьыланкывныс сиктӧ бӧр эз лок.
Ойдӧм юыс дыр зэв тані пессис,
Быттьӧ важлысь казьтыліс на шог.
Тӧдса меным скӧралӧмыс валӧн:
Важ нор песня сьывны эз нин кор.
Со тай выль бур сьылӧм юргӧ талун,
Важсьыс гажа изъя берегдор.