* * *

Стрӧга менам синмӧ
Видзӧдӧ Россия:
Сідзи-ӧ ме ола,
Кыдзи корӧ сійӧ?
Тӧдла уджлысь кӧрсӧ
Мирнӧй енэж улын.
Важӧн меным тӧдса
Слава чужан мулӧн.
Тан, ас крайын кыла
Пармалысь выль шыяс,
Но, а кӧнкӧ море
Чужтӧ сьӧкыд гыяс.
Паськыд менам муӧй,
Ещӧ паськыд мирыс.
Олӧны народъяс —
Поснияс и гырысь.
Ветлӧ шонді гӧгӧр
Миян важ планета.
Сылысь мичсӧ аддзиг,
Шонділӧн нюм петӧ.
Шондівывса чутъяс,
Тӧдӧмысь, оз бырны.
Эмӧсь и Му вылын
Нелючкияс пыр на:
Ылі другъяс ӧнӧдз
Рабство чепӧн дорӧм.
Но и налӧн сьылӧм
Йиджтысяс мӧд горӧн.
Важлӧн коляс налы
Волясӧ оз кӧвъяв.
Континентъяс костын
Шоналӧны тӧвъяс.
Ылі другъяс йылысь
Ме эг прӧста гарышт —
Найӧ ӧд и менӧ
Нимтӧны: «Тӧварыш!»
Гордӧй нимсӧ тайӧс
Босьтӧ мир ас киӧ.
Тайӧ кывсӧ мирлы
Сетліс выль Россия —
Менам кувтӧм муслун,
Югыд томлун менам.
Сыкӧд посни страстьяс
Ӧтсӧгласӧн венам.
Видзӧдӧ Россия
Стрӧга менам синмӧ.
Сылӧн дзик быд вӧйпӧм
Веськыда мен инмӧ.