ИЮНЬ

Кос тӧвруыс пӧльыштіс другысь,
Веж гыясӧн серлӧдліс луд.
Война коркӧ мирнымӧс дзугліс,
Июньын мед гусявны шуд.

Со тадз жӧ сэк кыпӧдчис шонді
И парманым нюмъяліс тадз.
Лӧз рӧмӧн жӧ енэжыс ойдіс,
Кӧзяйкаяс ломтісны пач.

Том кыдз дорын зыньгисны номъяс,
Выль асывлы радуйтчис дав.
А сэн, чужан мулӧн мӧд помын,
Сэк кыптіс нин ыджыд беда.

Беда, коді томлунлы дасьтіс
И дойсӧ, и быдпӧлӧс шог.
...Ме эска (ӧд сійӧн и казьті),
Мый мӧдысь беда нин оз лок.

Мед йирсьӧны ӧсьникын мӧсъяс.
Мед лэпталӧ гыяссӧ ю.
Мед ныв-зонлӧн збыльмӧ бур кӧсйӧм.
Мед ворсӧ став рӧмнас июнь.

Ӧд сьӧлӧмлы любӧ и муса,
Кор дзордзалӧ Войвывлӧн эрд,
Кор шондіыс окалӧ мусӧ,
Кор юкталӧ сійӧс чож зэр,

Кор вадорын ваксьӧны челядь,
Кор мужичӧй пӧвсалӧ видз,
Кор тӧвруыс вашкӧдӧ пеляд:
«Ой, гожӧмӧй... Регыдъя мич».

Бӧр усьӧм салдатлы не воны,
А ним сылӧн некор оз вун.
Быд честнӧйлы му вылын дона
Июнь, гожся лун, мирнӧй лун.