СЫЛӦН СЬЫЛАНКЫВЪЯСЫС ЮГЫДӦСЬ
Тавося март 2 лунӧ эськӧ тырис 70 арӧс коми поэт-фронтовик Федор Щербаковлы. Кыдзи тшӧкыда овлӧ, гижысьсӧ позьӧ и не аддзывны, не вочаасьлыны сыкӧд, а сылысь гижӧдсӧ кывлан радио пыр либӧ ачыд лыддьывлан — и пытшкӧсад асшӧр донъялӧм чужӧ, аслад видзӧдлас артмӧ. А кор нин паныдасян авторыскӧд, сэк казялан и сылысь морттуйсӧ, и медбур гижӧдъяс пыр сьӧлӧм воссьӧмсӧ.
Сэки на, кор велӧдчи Мохчаса шӧр школаын, нимкодьпырысь кывзылі «Менам Отчизна», «Гожся лунӧ», «Енэж кодь лӧз синъяса» да мукӧд сьыланкывъяс, кодъясӧс вайлісны радио гыяс Изьва юбердса сиктӧ. Мукӧд сьыланкывъяскӧд ӧтвылысь найӧ лэптісны ловтӧ, пыртісны сьӧлӧмӧ югыдлун, мелілун.
1952 воын ме медводдзаысь аддзылі поэт Ф. Щербаковӧс, кор волі Сыктывкарӧ том гижысьяслӧн совещание вылӧ. Ф. Щербаковлӧн, кыдзи мортлӧн да ёртлӧн лышкыдлуныс пыр жӧ шыбитчис синмӧ, сибӧдіс сы дорӧ. И бур ёртлӧн восьса сьӧлӧмыс сэсся унаысь на тыдовтчыліс — и гижӧдъяс кузя вензигӧн, и кыпыд пызан сайын пукалігӧн, и чери кыйигӧн. А сылӧн гылыд серамыс, тыр горӧн шуасьӧм-висьтасьӧмыс ӧні на быттьӧ пелям кылӧ.
Ме дыр эг тӧдлы, мый Ф. Щербаков том дырйиыс на волӧма менам чужан Изьва пельӧсӧ. И мортыс нӧшта на лои матыс, кор ӧти кывбурысь лыдди:
Изьва, Изьва! Видза олан!
Гажӧй тэ вӧсна зэв бырис:
Кызь во тэ дорӧ эг волыв,
Аддзи — лолӧй гажӧн тырис.
Видзӧдлыны кӧ поэтлысь ставнас творчествосӧ, ясыда аддзан, мый тэрыба шлывгысь Емва бокын чужлӧм-быдмылӧм поэт зілис век сьывны йӧз кост ёртасьӧм, дружбалун. Торйӧн нин тайӧ мыччысис сонетъясас, кодъясӧс Ф. Щербаков гижаліс бӧръя воясас.
Чужлӧма Федор Васильевич 1914 вося март 2 лунӧ Княжпогост районса Туръя сиктын, гӧль крестьянин семьяын. 1926 воын помаліс сэсь начальнӧй школа, а сэсся, кер дорын во уджалӧм бӧрын, велӧдчис техникумӧ дасьтан курсъяс вылын. Велӧдчис Ухтаса горнӧй техникумын, Коми пединститутын. Велӧдчигас и велӧдчигкостъясас сійӧ тшӧтш и журналисталӧ.
Великӧй Отечественнӧй война пансьӧм бӧрын регыд муніс фронт вылӧ. И, колӧ шуны, мир доръян тема, война йӧлӧгаыс кылӧ поэтлӧн зэв уна гижӧдын. 1943 воын сьӧкыда ранитчӧм Ф. Щербаков локтӧ гортас да велӧдӧ школаын, сэсся редакторалӧ районнӧй радиовещаниеын. Водзӧ сэсся сійӧ уджалӧ Коми музейса история отделын юралысьӧн, Коми книжнӧй издательствоын редакторӧн, журналисталӧ радиоын да «Югыд туй» газетын.
Медводдза книгаыс «Менам Отчизна» петаліс 1955 воын. Сы бӧрын поэт лэдзліс «Нёль сьыланкыв», «Тулыс», «Кодзувъяс оз кусны», «Бӧрйӧм кывбуръяс», «Если любишь», «Годы, расскажите о себе», «Поёт тайга» книгаяс. Миян Войвыв йылысь, ывла мич йылысь, сӧстӧм сьӧлӧма йӧз йылысь, пӧсь муслун йылысь гижис поэтыс. Кыпыдлун и жугыльлун, радлун и лӧглун, бурсӧ лэптӧм, лёксӧ мустӧмтӧм — татшӧм пытшкӧсса визьыс гижӧдъясыслӧн. Но медбура сьӧлӧм горыс Ф. Щербаковлӧн юрӧбтыліс сьыланкывъясын, кодъясӧс бордйӧдліс А. Осиповлӧн, В. Мастеницалӧн, мукӧдлӧн музыкаыс.
Федор Щербаков кувсис 1978 вося июнь 7 лунӧ. Тайӧ номерын журнал редколлегия шуис выльысь сетны поэтлысь некымын сьыланкыв, кодъяс сэтшӧма мусмисны коми йӧзлы.
