ДЗОР ПАРМА МЕНЫМ...

Дзор парма меным быдтор сетіс:
И сям, и вын, и мамлысь нюм...
Выль ордым талявны ме петі,
И юрын видза ӧти дум.
Мед чужысь кывбурлӧн строкаӧ
Эз сюйсьы зывӧктана лӧж,
Мед йӧзӧс юктавны не маӧн,
А честнӧй кывйӧн — олӧм чӧж.
Мед парма йӧзкӧд тшӧтш мен кывны
И тӧвлысь вын, и гымлысь гор.
Мед ӧтув праздник вылын сьывны,
А лёклы паныд нуны спор.
Мед ӧтув уджын страдна лунӧ
Эз личавлы и менам сой.
А шуас кодкӧ: «Сӧран уна», —
Ме дзеба морӧс пытшкӧ дой.
Ог, таысь некодӧс ог мыжав.
Код меысь ӧтдор мыжа, код?
Мый кодлы сетас юмов гижӧд?
Ни пӧсь, ни кӧдзыд, дерт, оз сод.
Дзор парма меным быдтор сетіс,
Но право вежнясьны эз сет.
...Выль ордым талявны ме петі,
Йӧз сьӧлӧмъясӧ воны мед.