ВОКЛЫ

Мекӧд пӧся сёрнитанныд витӧн...
Меным некор — тэрмӧдлӧ гудок.
Ставлысь серти меддыр куті китӧ,
Тэ ӧд менам дзик нин ӧти вок.
Нормин сійӧн, мый ме коля парма, 
Талявтӧм туй-ордым, тӧдса кӧдж?
Ӧтнад петан тэ ружьеӧн арнас,
Сэки, шӧйтіг, казьтышт менӧ тшӧтш.
Казьтышт. Да эн жугыльтчы тэ, Сашка.
Ме ӧд ог на тӧд, кӧн парма шӧр.
Колльӧдысь вой тӧлыс весиг вашкӧ,
Чужан вӧр-ваӧ мед локті бӧр.
И Москваын оз вун менам Коми.
Кӧджса кыдзьяс пӧрччысясны кор,
Локта сэк, дзик локта. Сідзкӧ, во мысьт
Кодкӧ кывлас кыклысь лыйӧм гор.