АССЯНЬ ТӦВРУ СОДТІН ЭН?

Ковтӧм важсьыс лолӧй мездмӧ,
Ог нин унаторйысь ляб...
«Мыйкӧ вежсис али эз нӧ
Олӧм-вылӧмас, земляк?

Перестройка — гӧгӧр кылам.
Выль ног тэчны гуг и бан
Чуксалӧны улын-вылын,
Ёсьмӧдлӧны сэн и тан».

Тадзи сусед вӧйпис талун.
Гӧрдов бана, дошлӧй, ён,
Вашъялӧ и ышлолалӧ,
Быттьӧ аслыс лэптӧ дон.

Падмылі...
Да кыдз тай пузя!
Али чуйдіс менӧ орт!..
«Мый нӧ, олан али узян
Олӧм гыяс костас, ёрт?

Ачыд, шуа, пеля-синма,
Вежӧр эм и сьӧлӧм, дерт,
Али шондіыс тэд инмӧ,
Кытчӧдз шондіыс оз берд?

Но а сэсся, бердӧм бӧрас
Лолад югӧр оз и коль?
Татшӧм дум визь весьӧпӧрас —
Мыйкӧ шогманаӧс доль.

Тӧдліс чужан му и тӧдлас
Оз на ӧти колан вен...
Вежсьӧмъяслӧн ыджыд тӧлас
Ассянь тӧвру содтін эн?

Дасяс велалӧмӧн овны
Лӧсьыд, да вед лов оз пӧт:
Пӧтмӧн тӧв ныр колӧ ловлы,
Мед нин бусӧссьӧм эз тӧд.

Ме и ачым унатор на
Ӧнӧдз та могысь эг вӧч,
Кӧть и кодсюрӧӧс торкла,
Олӧм ю мед вӧлі сӧдз,

Мед и визув шӧрас дзикӧдз
Сэсся эг нин волӧй пикӧ, —
Мӧд ног Вермӧмыс оз шед...»
Со тай вочавидзи стихӧн,
Тшӧтш и мӧдлы вичмас мед.