И. А. КУРАТОВ ЧУЖАНІНЫН ПРАЗДНИК
Иван Алексеевич Куратов... Тэрмасьтӧг, мӧвпалӧмӧнмоз шуан ним-вич-овсӧ медводдза коми поэтлысь — и быттьӧкӧ долыд ру шымыртлас: важ бурсӧ ошкан кыв волас, выльсӧ, аскиасӧ чолӧмалан шы-сер пытшкӧсад ыльӧбтас. Олӧмлӧн гажыс-дойыс, шудыс-шогыс ӧтпырйӧмоз вувзьысьлас-петкӧдчас сьӧлӧмад, вежӧрад сэки, кор выльысь лыддян:
Мортлы дзескыд пемыдын...
Шонді петмысьт быдсӧ таті
Паськӧдас тай... тіянлы!
Лолыштанныд кокньыда ті!
Петас, вокъяс, шонді-й тан!
Ме нин аддза — рӧммӧ ылын...
И енвевтса лысваыс
Югйыштас сэк шонді вылын!
Кольӧм нэмын шуӧм-чуктӧдӧм тайӧ строкаяссӧ лыддьӧм бӧрын вежӧрӧ воӧны поэтлӧн и татшӧм кывъяс:
Туй таланталы! Мед водзӧ мӧдӧ!
Сійӧс шог вылад эн синтӧммӧдӧ!
Тӧдӧ! —
Содтӧд выль ног бара на вӧрзьылӧ сьӧлӧм. И югзьылӧ пытшкӧсад сӧмын сыысь, мый и сэкся пемыд кадӧ Коми мулӧн лунвывладор пельӧсысь, Буб юдорса Кебра сиктысь петлӧма морт, кодлы шулӧма лоны медводдза коми поэтӧн, увтыртӧмаяслысь духовнӧй олӧмсӧ лэптысьӧн, выль сьылан ӧзйӧдысьӧн. И век, кор волан кыпыд мылькъяс вылӧ шевкнитчӧм Куратовоӧ, кӧні чужис-быдмис поэт, тӧд вылад усьӧны сылӧн строкаясыс:
Корсям сьыланкыв ас шӧрысь,
Ас му-ва вылысь, ас вӧрысь...
Ас шӧрысь, ас йӧз костысь казялӧм сьыланкывлы поэт сетіс вылын художествоа форма, пӧсьӧдіс сійӧс сьӧлӧм бинас. И зэв бур, мый медводдза коми поэтлы сиӧм поэзия праздник лоис быд восяӧн.
Таво со квайтӧдысь нин нуӧдӧма И. А. Куратовлӧн чужан сиктас татшӧм праздниксӧ, коді овлӧ видз вылӧ петӧм водзвылын. Асывсянь нин Куратовоӧ воалісны сьӧрсьӧн-бӧрсьӧн автобусъяс, посни и гырысь автомобильяс. Сиктса шӧр, веж пиӧ вӧйтчӧм площадь шызис-гызис Сыктывкарысь, Визинысь да мукӧдлаысь локтӧм йӧзысь. Праздник лунся паськӧмаӧсь гузьгисны-локталісны матыс и ылыс грездъяссаяс. Юргис музыка. Сэні жӧ котыртӧм ярмарка вылын вузасисны карысь, посёлокъясысь, сиктъясысь воӧм автолавкаяс. Уджаліс книжнӧй магазин.
Йӧзӧс гажӧдны воисны артистъяс, музыкантъяс, самодеятельностьын участвуйтысьяс. Праздник вылынӧсь жӧ и республикаса да Сысольскӧй районса партийнӧй да сӧветскӧй органъясса веськӧдлысьяс. Таво воліс и Сыктывкарын выльӧн артмӧдӧм Куратовскӧй районысь делегация. Праздник нуӧдӧмас участвуйтісны КПСС Коми обкомысь культура отделса заведующӧй А. В. Соколова, Коми АССР культураса министр В. К. Колегов, министрӧс вежысь, драматург Н. Ф. Белых.
Гижысьясыс вӧлім сизимӧн — Серафим Попов, Геннадий Юшков, Нина Куратова (ачыс Куратовоысь петліс), Надежда Мирошниченко, Юрий Ионов, Александр Некрасов, Владимир Попов. Но миянкӧд тшӧтш ветлісны медводдза коми поэтлӧн чужанінӧ и Карпат сайысь волӧм гӧстьяс — украинскӧй поэтъяс Юрий Шкробинец, Петро Скунц, венгр кыв вылын гижысь Борбала Салаи.
Сэні праздниксӧ восьтігӧн Сысольскӧй райисполкомса председательӧс вежысь А. И. Семенчин тӧдчӧдіс, мый И. А. Куратовлӧн поэзияыс оз вун, оз чусмы, сійӧ важ моз вӧрзьӧдӧ йӧзлысь сьӧлӧмъяссӧ.
— Эм Куратовлӧн «Коми бал» кывбур, — висьталіс Сыктывкарлӧн Куратовскӧй районса делегацияысь член В. И. Витязев. — Сэні висьтавсьӧ коми йӧзлӧн рытпукӧм, гажӧдчӧм йылысь. Татшӧм кыпыд бал кодьӧн, югыд праздникӧн лоис поэтӧс ыдждӧдлан тайӧ луныс.
Памятник дорын, а сэсся восьса сцена вывсянь юргисны коми, роч, украинскӧй, венгр кыв вылын кывбуръяс. Карпат сайса гӧстьяс лыддисны И. А. Куратовлысь кывбуръяссӧ украинскӧй да венгр кывъяс вылын, а сідзжӧ тӧдмӧдісны кывзысьясӧс поэтлы, сійӧс быдтысь-сӧвмӧдысь мулы, коми йӧзлы сиӧм асланыс кывбуръясӧн.
Колӧ нимкодьпырысь пасйыны, мый Куратовскӧй поэзиялӧн водзджыкса праздник вылӧ воавлісны Москваысь, Ленинградысь, Карелияысь, Казахстанысь гижысьяс. Воысь воӧ И. А. Куратовлысь поэзиясӧ радейтысь войтырлӧн лыдыс содӧ.
Петро Скунц коми поэтлӧн чужанінас лыддис нёль строкаа, сӧмын на чужӧм кывбур-чолӧм:
Сюда приіхав издаля,
Тебе вітаемо, земля,
Уклін, земля Куратова,
Як сестрина та братова!
И украинскӧй кыв вылын лыддьӧм тайӧ куплетсӧ чукӧртчӧм войтырыс ёна ошкисны. Найӧ дыр аплодируйтісны поэтлы.
Гижысьяс бӧрын восьса сцена вылӧ кыпӧдчисны «Асъя кыа» ансамбльысь сьылысь-йӧктысьяс, баянистъяслӧн трио — В. Данилочкин, В. Волохов, В. Майсерик, Визинса да Куратовоса фольклорнӧй коллективъяс, паньӧн ворсысьяс — велӧдчысьяс, кывбур лыддьысь том йӧз... Ылӧдз кылісны репродукторъясӧн горсьӧдӧм сьыланкывъяс, кодъясӧс гижӧма И. А. Куратовлӧн да мукӧд коми поэтъяслӧн кывбуръяс вылӧ да сиӧма ас чужан мулы, шуд вӧсна, мир вӧсна тышлы.
Шпоргисны веж коръяса ён топольяс. Дзирдаліс шонді. Ачыс ывла вылыс быттьӧкӧ долыдмис поэзия праздниксьыс (ӧд сыӧдз век на зэрласис). Томъяс и пӧрысьяс, быдӧн, кодлы муса да дона И. А. Куратовлӧн творчествоыс, сёр рытӧдз гажӧдчисны медводдза коми поэтлӧн чужан сиктас.
Мед нӧ и водзӧ став рӧмъяснас-шыяснас югъялӧ да войвывса му весьтын юргӧ И. А. Куратовлӧн поэзияыс, коми сӧветскӧй поэтъяслӧн сьыланкывъясыс миян уна нацияа ӧтувъя хорын!
