ЖУРНАЛ ЛЫДДЬЫСЬЯС ДОРӦ КЫВ
Дона войтыр, ставӧн, кодлы матысса да ас «Войвыв кодзув» журнал!
1989 вося июнь 30 лунӧ на партия Коми обкомлӧн бюро шуис ыдждӧдны выль восянь «Войвыв кодзув» журналнымӧс. Тайӧн лоис могмӧдӧма корӧмъяссӧ и республикаса гижысь котырлысь, и журнал редакцияын уджалысьяслысь, и не ӧти авторлысь шыӧдчӧмъяссӧ. Тайӧ — гласность да демократия кадлӧн петкӧдчантор, Комиын печатьлӧн туй визьын нимкодьӧдан пас.
Тайӧ номерсянь журналным кутас петны 80 лист бока (воддза 64 лист бока пыдди). А вӧвлі кад, кор и 56 лист бокӧдз топӧдлісны Коми АССР-са писательяс Союзлысь органсӧ — мирас дзик ӧти коми литературно-художественнӧй да общественно-политическӧй журналсӧ, коді ассьыс олан туйсӧ нуӧ 1926 восянь. Дерт, оз сӧмын лист бок лыд петкӧдлы гижысьяслысь сямсӧ, литературалысь вылнасӧ. Но и йӧршитны-дзескӧдны ӧтарӧ содысь-паськалысь литературнӧй вынъяссӧ нинӧмла жӧ, збыль кӧ радейтам коми литература да искусство, ог кӧ сӧмын кыв вылын вӧзйӧй сылы сӧвмыны, кыптыны, ог кӧ сӧмын сёрниӧн тӧждысьӧй сы могысь.
Воссьӧ ыджыдджык позянлун йӧзӧдны и художествоа гижӧдъяс, и критико-библиографическӧй да публицистическӧй статьяяс, и Войвывнымлӧн историяысь дзеблӧм-саймовтлӧм фактъяс, и важыслысь колана паметьсӧ пальӧдан пасйӧдъяс, и ӧткымын пӧшти вунӧдӧм воддза литераторъяслысь висьтъяс, очеркъяс, кывбуръяс, и «Войвыв кодзувлӧн» почта кудйӧ пуктӧм письмӧяс.
«Войвыв кодзувлӧн» редакция и водзӧ кутас зільны сы могысь, мед гижӧдъясас тырвыйӧджык воссис кадыслӧн медшӧрыс — правда корсьысь да сы вӧсна тышкасьысь мортлӧн образ. Коми республикаын бӧръя кадас котыртчисны «Мемориал», «Коми котыр» обществояс, Печораӧс доръян комитет, Коми муӧс сӧвмӧдан благотворительнӧй фонд, Москваын — «Коми котыр-увтыр» чукӧр, кытчӧ пырисны коми-зыряна, коми-пермякъяс да мукӧд кывъя йӧз, кодъяслӧн рӧдыс вӧлӧма Комиын. Лӧсьӧдчӧны артмӧдны Мозын юӧс ӧтвылысь видзан-доръян чукӧр. Перестройкалӧн тайӧ пасъясыс кутшӧмакӧ тыдовтчасны жӧ журналын йӧзӧдӧм гижӧдъясын. Журналса лист бокъясын эз на мыччӧдчы СССР-са народнӧй депутатъяслӧн, Комиысь бӧрйӧмаяслӧн, уджныс-тӧждысьӧмныс, водзмӧстчӧмныс либӧ падъялӧмныс.
Редакция оз кут ӧтдортчыны плюрализмысь, ӧткымын вӧвлӧмторъяс вылӧ не ӧтмоза видзӧдӧмысь, гижӧдъясыс кӧ збыльысь отсалӧны петкӧдлыны этшсӧ, фактыслысь бансӧ, гугсӧ.
1990-ӧд во — литература олӧмас Тима Веньлӧн (Вениамин Тимофеевич Чисталёвлӧн) во. Коми литературасӧ подулалысьяс пӧвстысь нӧшта ӧтилы тырӧ чужӧмсяньыс 100 во. Кольӧм, 1989-ӧд воыс босьтліс эстафетасӧ 1988-ӧд волысь — Нёбдінса Витторлӧн (Виктор Алексеевич Савинлӧн) 100 арӧс тыртан волысь. А ачыс 1989-ӧдыс муніс медводдза ыджыд коми поэтнымлӧн, Иван Алексеевич Куратовлӧн 150 вося юбилей пас улын. Миян айяс-классикъяслӧн творчествоныс и ышӧдӧ, ӧзйӧдӧ, нимкодьӧдӧ, и ӧттшӧтш зумыштчӧдӧ, тшӧктӧ лоны олӧм дінас сюсьӧн, ылыстӧ кыв куттӧмлунысь, чуксалӧ тӧждысьны ас гӧгӧрсаяс вӧсна.
Журнал редакциялӧн портфельын куйлӧны прозаа да драмаа ыджыд гижӧдъяс Борис Шаховлӧн, Геннадий Юшковлӧн, Виктор Напалковлӧн, Иван Тороповлӧн, Пётр Шаховлӧн, Алексей Поповлӧн, Александр Размысловлӧн, Александр Парначёвлӧн, Ганс Шуктомовлӧн, Александр Комилӧн, Зосима Паневлӧн, олӧма да том мукӧд гижысьяслӧн, учёнӧйяслӧн, специалистъяслӧн интереснӧй висьтъяс, очеркъяс, кывбуръяс, статьяяс. Ставсӧ найӧс чайтам йӧзӧдны таво. Кыдзи и кольӧм воын (майся номер), сідзи и таво журналса ӧти номер дзоньнас жӧ сетам томъяслӧн творчестволы. Лӧсьӧдчам журналлӧн ӧти номерлысь ыджыд юкӧн сетны республикаын олысь роч гижысьяслы — йӧзӧдам налысь висьтъяс, кывбуръяс, очеркъяс, пасйӧдъяс комиӧдӧмӧн.
Сідз тай нин ыджыд олӧм-вылӧмас артмӧ: оз быд гижӧд ӧтмоза нимкодьӧд быд лыддьысьысьӧс, журналын йӧзӧдлӧм оз быд гижӧд ло шедеврӧн, оз ставыс пыр литературалӧн зарни фондӧ. Но олӧмсӧ ас ногӧн, талантливӧя, пыді видзӧдласӧн югзьӧдӧм быд гижӧдлы кутам сетны туй.
