ВЫЛЬ УДЖӦ ӦЗЙӦДІС МОСКВА
Сӧветскӧй Рӧдинанымлӧн столицаын Коми АССР-лӧн литература да искусство лунъяс дырйи сэтчӧс коллективъясын аддзысьлӧмъяс менам сьӧлӧмӧ колисны кык бур пас. Найӧ, ӧти-кӧ, ышӧдӧны, а мӧд-кӧ, содтӧны водзӧ вылӧ кыв кутӧм.
Збыль, кыдзи нӧ оз ышӧд, кыдзи нӧ оз кыпӧд сьӧлӧмтӧ-вежӧртӧ, шуам, М. М. Шемякин нима Биоорганическӧй химия институтӧ волӧмыс, сэтчӧс исследовательяскӧд сёрнитӧм-висьтасьӧмыс? Наӧн аддзӧмторъясыс отсалӧны физиологиялы восьтыны мортлысь став позянлунсӧ да и йӧз овмӧслы ыджыд пӧльза сетӧны.
«Геофизприбор» заводса генеральнӧй директор В. П. Сухарев коми гижысьяскӧд аддзысьлігӧн кыпыда тӧдчӧдіс: «Миян сейсморазведочнӧй станцияяс отсалӧны корсьны-аддзыны тіян муысь озырлунъяссӧ. И со ми, нефть да газ кындзи, асалам коми литератураӧн перйӧмторсӧ, кывзам коми гижысьясӧс и радлам художествоа литература лӧсьӧдӧмын тіян вермӧмъяслы».
Аслыным миянлы лоис содтӧд гӧгӧрвоана медбурыс, мый быдӧнлӧн эм, лӧсялӧ нин и ставсоюзса лыддьысьысьлы, но пытшкӧстӧ ӧттшӧтш йирӧ мӧвп: мыйта на колӧ корсьысьны, ӧзйӧдчыны, медым олӧмсӧ пыдісяньджык, став ассикаслуннас петкӧдлыны, выль ногасӧ восьтыны! Мыйта на чужан кывнымлӧн позянлуныс эрдӧдтӧм, талантӧн сӧдзӧдтӧмыс! А сідзкӧ и ыджыд литература водзын уджйӧзыс эз на быр.
Республикаса гижысьяс да Москваса лыддьысьысьяс костын сёрнияс-аддзысьлӧмъяс лоисны коланаӧсь, ышӧданаӧсь, сёрниным муніс ышнясьтӧг, веськыда, восьсаӧн. Ставыс ӧд, мый вӧчсьӧ-пузьӧ тані и сэтӧн, ӧтласа, ӧтувъя.
Тайӧторйыс, дерт, тыдовтчис и бурӧвӧй техника институтын, кӧні актӧвӧй залныс весиг эз вермы тӧрӧдны литературнӧй рыт вылӧ воӧм став йӧзсӧ да уналы ковмис кывзыны сувтсӧн. Тадзи жӧ муніс аддзысьлӧмыс и Россияса Ленин ордена Центральнӧй телеграфын, кӧні уджалӧны нёль тысяча гӧгӧр морт.
Военно-патриотическӧй тема колана ногӧн лэптӧм йылысь думсӧ бара на чужтіс Москваса гарнизонысь салдатъяс дінӧ волӧмыс, кӧні менам гижысь ёртъяс зілисны жӧ тырбура восьтыны медбурсӧ коми литератураысь. Кутшӧм чӧла пукалісны да кывзісны том воинъяс, кор поэт-фронтовик Серафим Попов лыддяліс война лунъяслы, Рӧдина дорйӧмлы сиӧм кывбуръяс.
Менам оз вун миянӧс, Коми комсомоллӧн премияа лауреатъясӧс да самодеятельнӧй коллективъясса том участникъясӧс, ВЛКСМ ЦК-ӧ корлӧмыс. ЦК-са секретарь А. Н. Колякин сетіс мен да мукӧд ёртъяслы комсомол ЦК-лысь Почёт грамота.
Мӧрччис сьӧлӧмӧ и РСФСР-са писательяс Союзлӧн секретариатӧ волӧм, кӧть сэні медсясӧ кылім ӧтарджык ошкана кывъяс. Но, ӧти-кӧ, Россияса гижысьяс пӧвстас и ми тыдалам, мӧд-кӧ, тайӧ тыдовтӧдӧмыс оз сет ланьтӧдчыны, оз лэдз кольччыны коркӧся тшупӧд вылын. Россияса гижысьяс котырысь секретарьяс, нималысь гижысьяс Николай Доризо, Валерий Поволяев, Анатолий Алексин, Александр Рекемчук, Юрий Грибов, Михаил Шевченко да мукӧд зэв сьӧлӧмсянь сёрнитісны Комиын сӧвмысь литература йылысь, ыззьӧдісны выль уджӧ, выль гижӧдъясӧ. Сьӧлӧмсянь аттьӧ сыысь!
Тайӧ ыджыд аттьӧ кывсӧ тыр гӧлӧсӧн шуалім и Литераторъяслӧн Центральнӧй керкаын, кӧні коми гижысьяскӧд тшӧтш выступиталісны и Москваса прозаикъяс, поэтъяс, критикъяс, переводчикъяс.
Сійӧ жӧ рытӧ К. С. Станиславский да В. И. Немирович-Данченко нима театрын миян республиканскӧй музыкальнӧй театр петкӧдліс «В сердце и в памяти» сценическӧй оратория, кодӧс лӧсьӧдӧма Л. И. Брежневлӧн «Малая земля» книга серти.
И Краснӧй площадь вылӧ волӧмыс, В. И. Ленин Мавзолейӧ пыравлӧмыс, Тӧдтӧм салдат гу дорӧ, Куслытӧм би дінӧ матыстчылӧмыс да венокъяс пуктӧмыс, и нӧшта мусаджыкӧн лоӧм москвичьяскӧд уналаын аддзысьлӧмъясыс дыр оз вушйы паметьысь. Выль уджӧ, выль корсьысьӧмъясӧ, выль гижӧдъясӧ ӧзйӧдіс Москва!
