ЮГЗЬӦ ТУВСОВ ШОНДІ МОЗ
В. Г. Лодыгинлы                 

Эжва ойдлӧ, Эжва ямлӧ,
Берег дор — то няйт, то кос...
Лолад — нюмыс аслад мамлӧн
Югзьӧ тувсов шонді моз.

Да и кадыс — буретш тулыс,
Да и шонді — лышкыд лов
Буретш венӧ отсӧ юлысь,
Гызьӧм веркӧссьыс оз пов.

Дерт, и тэ он овлы шогтӧг, — 
Талун сэтшӧм нимкодь тэд:
Локтӧ мамыд, мамыд локтӧ,
Лун-мӧд гӧститыштны мед!

Сьӧлӧм вылад — шыа-гыа:
Радлун сэн и колан тӧжд.
Енэж абу нэмсӧ гыма — 
Нэмтӧ веськодьлун он тӧд.

Ыджыд шудным — водзын век ӧд,
Но тэ помтӧг шуда, ёрт,
Кытчӧдз му вылас на тэкӧд
Тэнӧ чужтысь-быдтысь морт.