ЭН МЕДВОДДЗАЫСЬ ПЕТ

И долыд тэн, и югыд —
Ӧд туйыд водзын, кузь.
Но ӧттшӧтш тэ и жугыль,
Кыдз быттьӧ пӧдтӧ мудз.

А поезд ассьыс тӧдӧ —
Стык бӧрся лыддьӧ стык.
И мунан тэ сы ӧдӧн —
И абу ковтӧм зык.

Ас вӧляысь тэ мунан,
Сідз корӧ аслад лов,
И, сідзкӧ, татшӧм лунас
Тэн шогсьыны оз ков.

Ӧд ветлан — да и воан,
Эн медводдзаысь пет,
Кӧть ачыд гӧгӧрвоан:
Зэв паськыд вӧльнӧй свет;

Но кывтӧ-шуньгӧ олӧм, —
Кӧть кытчӧ тэ эн мун;
И тэнад важ посёлок
Важ керканад оз вун;

Ӧд колис сэн бур ёртыд
И рӧдвуж колис сэн;
А накӧд весиг гортыд
Пыр мусаджык и тэн.

Би югӧр тювгӧ муті —
Вагонкӧд орччӧн пыр.
Он нюмъёвт, кыв он шу тэ,
А куритчан зэв дыр.

И станцияяс костын
Он лэптыв син ни юр,
Кыдз быттьӧ мыйкӧ воштін,
Да ӧнӧдз со эз сюр.