ТУЛЫС КОДЬ ТОМ

Югъяв, шонді,
Лӧз енэжӧд быгыльтчы
Гӧрдӧдӧм мачӧн.
Мед нӧ качнытӧ тэн
Ыджыд эрдас
Дзик нинӧм оз торк.
Кор нин лун шӧрнас
Медвылыс тшупӧдӧдз качан,
Вывсянь нӧшта на нюмъёвт
Ныв-аньяслы,
Кыдзи бур ёрт.

Ӧтар бандзибнад
Изьвалань нёровтчыв, шонді,
Мӧдар бандзибнад
Пыкышт тэ
Лунвывса Луз.
Шаля-чышъяна войтырӧс
Аснад тэ Войвылысь шонты.
Дона нывъяслӧн-аньяслӧн,
Тэнад моз,
Нюм мед оз кус.

Тэнад югӧръяс улын
Ме, шондіӧй, налы жӧ шуа:
«Чолӧм, донаяс!
Праздникӧн,
Коді быд тулыс кодь том!
Олӧм туйныд мед
Тіянлӧн лоӧ пыр шуда.
И пӧсь радлунлы-гажлы
Мед оз волы пом!

Му выв дзоридзьяс, ті
Лӧзӧн ыпъялысь
Ас енэж улас.
Олӧм кутысьяс
Нэмнытӧ вӧлінныд — 
Лоӧй и водзӧ ті пыр.
Тіян праздникӧн
Му вылын
Вынсялӧ-бордъяссьӧ тулыс.
Сыӧн менам тшӧтш
Сьӧлӧмӧй тыр».

Живгы, тӧлӧй.
Тэн кыпыда,
Долыда сьывсьӧ.
Тулыс восьтысь бур праздниксӧ
Сьыланнад быдлаӧ ну.
Ӧд и мамъяслӧн, чойяслӧн
Уджӧн тшӧтш нималӧ-кывсьӧ
Выльдӧм тулысӧ пырӧдчысь
Миян ас му,
Чужан му.