ПЫР БЫТТЬӦКӦ ГОРТӦВЫВ МУНА

Пыр йӧз дінӧ, йӧз дінӧ пыр
И подӧн, и транспортӧн муна,
А тӧждысьӧм некыдз оз быр,
И ӧнӧдз на дойыс зэв уна.

Эн, сьӧлӧмӧй, нетшкысь сідз, эн.
Быть коланаинӧдзыс воа.
Кӧн туй помӧй петкӧдчас мен,
Выль войтырлы гӧстьӧн сэн лоа.

А сэн, кытчӧ ӧні ог лок,
Но верма на веськавны-воны,
Сэн, тӧдӧмысь, оз жӧ ло лёк,
Сэн пытшкӧснам тӧдла жӧ шоныд.

Выль ёрткӧд сэн югзьӧдам вой —
Эз кус на ӧд сьӧлӧмысь биыс.
И личӧдам бырлывтӧм дой,
И ӧтвылысь кокньӧдам сійӧс.

Ме эстӧн и сэн, вӧлӧм, ас,
Кӧть, сідз кӧ нин шуны, и кортӧм.
Кӧть кытчӧ ог лок изьватас,
Но эстӧн и сэн быттьӧ гортын.

Россиялӧн пом эм и дор,
Но помсяньыс дорӧдз ок ылын!
И сьӧлӧмӧс вынсьӧдантор —
Быд пельӧстор ӧтласа сылӧн!

Кор выльлаын кыптӧ выль лун,
Ме кыла нин сэк, кӧть ог шу на:
Россияӧд кытчӧ ог мун —
Пыр быттьӧкӧ гортӧвыв муна.