ПЫЖЫН ПУКАЛӦНЫ КЫКӦН...

Кытӧн, томлунӧй, тэ кытӧн,
Менам сьывсьӧм сьыланкыв?..
Пыжын пукалӧны кыкӧн — 
Удал зон да мича ныв.

Зонмыс — нырас,
Нылыс бӧжас...
Зонмыс сынӧ, нылыс оз.
Ӧта-мӧдлы кывтігчӧжыс
Кыв оз шуны дуригмоз.

Нывлӧн синкӧд зонлӧн синмыс
Вочасьліс — и нем оз ков:
Югӧр шӧрӧ югӧр инмас — 
Ас ног югзясны кык лов.

А кык гӧрӧдасьӧм югӧр — 
Ӧта-мӧдӧс йитысь нюм.
Пыжлысь шлывгӧмсӧ оз дугӧд
Изъя коськ ни гуся джум.

Сэтчӧ кывтӧны-ӧ, сідз-ӧ, — 
Оз тай нӧд и кырйыв коз...
Мед нӧ кыклысь ладсӧ видзӧ
Визув мир — кык берег кост.