НИМЛУНӦН, РЕСПУБЛИКАӦЙ, ТЭНӦ!

Август.
Лышкыд шонді петӧ.
Чӧв.
Рӧмыдсӧ тась
Асыв бара венӧ.
Со нин ыльгӧ
Ӧдӧбтӧмӧн тӧв...
Нимлунӧн, Республикаӧй,
Тэнӧ!

Сьӧлӧмъясын олӧ мед,
Оз быр
Мулӧн эбӧс-вын
И енэж лӧзыс,
Чой-вок моз жӧ
Донаӧсь мен пыр
Водзмӧстчысь
Да ловнас ӧзйысь йӧзыс.

Ӧзйӧмсьыныс
Содӧ олӧм гор,
Сійӧс, кыдз бур сьылансӧ,
Он дугӧд...
Чолӧм,
Штрекын муркӧдчысь шахтёр!
Тэ Вой мулы
Шоныд сетан, югыд.

Вӧр лэдзысьлы
Менам сьыланкыв!
Шондіыс мед сы ордысь
Оз петав.
И речниклы
Нюжӧда ме сыв,
Коді лэптӧ гыяс
Тан и этан.

Тепловозлӧн
Чуксасьӧ гудок, —
Машинистлы «Бур туй!»
Пӧся сиа.
«Ылӧ лэб
Да ас кадӧ бӧр лок!» —
Долыда
Пилотлы ӧвта киӧн.

Вылі лэб
Строительлӧн пӧсь лов,
Карын, сиктын
Керка лыбӧ вылӧ.
Бумагатӧг
Гижысь морт оз ов, —
Коді вӧчӧ сійӧс —
Аттьӧ сылы!

Видз-му керысь,
Муӧдз копыр тэд!
Бура тӧдан
Страднаяслысь донтӧ.
Долыда и тэныд
Овсьӧ мед.
Быдӧнӧс тай
Уджыд-тӧждыд шонтӧ.

Уна кывъя
Менам чужанін,
Йӧз кост дружбалуннас
Тэ зэв озыр.
Восьса менам сьӧлӧм,
Восьса син —
Шудным олӧ
Оз ичӧтик позйын.

Стрӧитны да овны —
Медшӧр мог.
Мӧд бур мог
Оз тӧд
И Коми муным.
Радлун тшӧктӧ шуны —
Ӧти ног:
«Коми муӧй менам,
Праздник лунӧн!»