НИМКОДЬ!

Быттьӧ югдісны Изьвадор ягъяс:
Ыджыд радлунным вичмӧ и налы.
Флагъяс, копрасьӧй! Копрасьӧй, флагъяс!
Талун нимкодь ӧд быдса страналы.

А страналы мӧй ӧтнаслы сӧмын!
Выльмӧм сьӧлӧмъяс быдлаын эмӧсь.
Асшӧр вын — миян знамялӧн рӧмын:
Миян правдаӧн кыпалӧ нэмыс.

Тэ, Октябрь, ӧтчыд му вылас чужлін,
Медым жуглыны важсӧ да лёксӧ.
Тэнӧ нимӧдны век на ми кужлім.
Тэкӧд збыльмӧдам медыджыд могсӧ.

Мыйта мытшӧд на путкыльтны колӧ,
Некӧн мед эз ло бурыслы дзескыд.
Долыд мен: Революция олӧ,
Сылы аслыным моз жӧ ми эскам.

Кӧдзыд кывъяссӧ ми огӧ дольӧй.
Вӧчам сідз, медым тӧдісны ставӧн:
Революция — со миян воля.
Революция — со миян слава.

Туй кӧ панӧма — чуксалӧ сійӧ.
Сідзкӧ, помӧдзыс мунны и мунны.
Чужан лун пасйӧ вӧльнӧй Россия —
Миян шудным — гӧрд флагувса муным.