МАМЛЫ

Чужан керкакӧд янсӧдчи ме,
Тэнӧ куимысь окышті, мамӧй.
Пароходыс нин вӧрзис, а тэ
Мен на горӧдін:
— Сэн, чемоданас...

Мый жӧ сэн — пырсӧ эг гӧгӧрво,
Сӧмын дыр на руд кепканам ӧвтчи.
Кор нин ю весьтӧ пуксис сэзь вой,
Вылыс палуба вылысь ме лэччи.

Кывтім ылӧдз нин. Сӧмын тай мам
Быттьӧ бара на кыр йылӧ петіс...
Восьті ме ассьым выль чемодан:
Часлы, видзӧдла, мый жӧ эм сэтӧн?

Кыски ичӧтик юрлӧс ме сэсь,
Гӧлубӧй рӧма кышӧдыс сылӧн.
Быттьӧ енэжӧ мича, веж лыс
Вышивайтӧма мамӧй сы вылӧ.

Сійӧ скӧт дорын уджалӧ пыр,
Кор нин та вылӧ кад сылы сюрис?
Сэсся мам йылысь думайтігтыр,
Пукті юрлӧсыс вылӧ ме юрӧс.

И мен кажитчис, быттьӧкӧ друг
Мамӧй меліа малыштіс менӧ.
Быттьӧ шӧпнитіс: «Узь, пиук, узь.
Мунан туйыд ӧд зэв на кузь тэнад».