* * *

Да, ме лыбӧдчысь пармалӧн пи — 
Мен ас войтыркӧд мунсьӧ и локсьӧ.
Но, лёк сьӧлӧмӧн олысьяс, ті
Уна, тыдалӧ, вӧчад на лёксӧ.

Сымда сотім нин туй вылысь ёг,
Сымда югыд нин ломалӧ лолын!
Но кор кодлыкӧ ті вӧсна шог,
Ме мӧй верма сэк долыднас лоны?

Быдса Му — да сэн ичӧтик морт!
Меным сійӧ и эсійӧ муса.
Но ме вежӧрта тшӧтш сэтшӧмтор — 
Ӧти муслуннад лёксӧ он кусӧд.

Кӧть и сэк овлӧ енэжыс лӧз,
Кор нин шондіыс шойччыны пырис,
Но ме кӧсъя, эз личав мед лӧг,
Медым лӧгыс век тіянӧс зырис.

Коді сьӧлӧмнас сӧвмӧдӧ мич,
Сійӧ мичсӧ век мукӧдлы видзтӧ.
Но код мичлунсӧ пытшкас оз видз,
Сылы-й некор не тӧдлыны мичтӧ.

Лёкыс — ыджыд кӧть ичӧт — век лёк
И министрлы, и мен, радӧвӧйлы.
Но и бурыс, дерт, ачыс оз лок,
Колӧ косясьны, вӧчны и вӧйпны.

Да, ме лыбӧдчысь пармалӧн пи,
Сійӧн пытшкӧсӧй шогсьӧмӧн шогсьӧ:
Кырныш сьӧлӧмӧн олысьяс, ті
Уна, тыдалӧ, вӧчад на лёксӧ.