БЫТТЬӦ ТАН ОВЛІ...
В. Н. Вьюхинлы                 

Мортыс тай ёртасян рунас и шуда...
Шуӧмӧс вынсьӧдан, станция Суда?
Станция, кутшӧмыс му вылас уна,
Тэ дінті гортӧвыв поездӧн муна,
Тэнсьыд ни бантӧ, ни этштӧ ог тӧд на.
Абу вед татчӧс ме, станция, рӧднам.
Шпалъяслӧн пельпомъяс вынаӧсь важ моз.
Сӧмын мӧй таысь и сьӧлӧмӧй гажмис?
Эг татӧн бордъясьлы, эг петав татысь,
Тӧдтӧм роч пельӧсыс мен тай тшӧтш матыс.
Ёртӧй тась. Судасьыс, петлӧма коркӧ,
Комиын лоис мен сійӧ бур ёртӧн.
Сылӧн сьӧд синъясас шондіа югӧр — 
Ёртӧйлӧн нюмысь ог ло, небось, жугыль.
Ёртӧй, кыдз шуласны, ылын да вылын:
Уджалан нырвизьыс енэжын сылӧн.
Ас чужан мулӧн быд помӧ, быд дорӧ
Лэбалӧ ёртӧй, кыдз делӧыс корӧ.
Быдтор, мый вешйӧ да син улам инмӧ,
Аддза ме татысь тшӧтш ёртӧйлӧн синмӧн.
Быд лунъя страдалӧн бусыс выль тӧлӧн
Лэптыссьӧ, вӧтӧдчӧ рельсъясным пӧлӧн.
Ӧвтчӧны корнаныс топольяс, шаньӧсь,
Кыдзи со дзирдыштысь флажока аньыс.
Поездным ӧддзӧ — и кывсьӧ пӧсь ловлы,
Быттьӧ тан вӧвлі нин, быттьӧ тан овлі.