* * *

Быд ловлы асьсӧ мыччӧ дзик выль лун,
Век рытывланьӧ банӧн сійӧ кывтӧ.
И лунбыд кежлӧ ывла воштӧ ун,
И сьылысь кай оз вермы овны сьывтӧг.

А луныс — быттьӧ шемӧсмӧдысь тун.
Дерт, сылы воча паськӧдан сэк сывтӧ.
Оз, некор выльмӧм пармалӧн оз вун
Сы бурыс, коді мунліс парма вывті.

Лун — помтӧм-дортӧм нэмлӧн сӧмын здукыс,
Но коді сыкӧд ассьыс лёксӧ юкис,
Мед кодкӧ вылӧ ыстысьны оз мӧд,
Мед ачыс асьсӧ куландорыс ёрӧ.

Лун кывтӧ водзӧ, коставлӧм оз тӧд,
Лун ас бӧрсяыс вӧтчыны, со, корӧ.