* * *

Ас сьӧвмӧса, ас бандзиба, ас гора —
Кузь туйӧ мекӧд лӧсьӧдчы да пет.
Йӧз сьӧлӧмъясӧдз, быттьӧкӧ Печора,
Тэ шлывгы-кывт да сибӧдчы, сонет.

Код тэныд, туйӧ вӧрзьӧдчӧмлы, сорас?
Мед аслыд сӧмын ляпкавны эн сет,
А джуджыдлуныд, визувлуныд корас —
И ас бӧрсяыд мӧдӧдчас поэт.

Сэк аддзан ачыд, мый и вой шӧр войӧ
Бур йӧзлӧн сьӧлӧм югыдсӧ тэд койӧ,
Дерт, сэсся, кытчӧ оз ков, он на-й мун.

Но лӧзӧдӧ нин гӧгӧр — тан и сэтӧн,
Сьӧд мусюр сайысь ыджыд кыа петӧ.
Быд ловлы асьсӧ мыччӧ дзик выль лун.