* * *

Августса рытгорув моз
Норлунсӧ тӧда и ачым.
Гортын оз пукавсьы, оз,
Лэчча ме вадорӧ надзӧн.

Кутшӧм кӧть ме водзын ю —
Оттӧм кӧть ота да ыджыд, —
Юыс мем, кыдз кок ув му,
Мӧвпӧйлы-тӧждӧйлы мыджӧд.

Олӧмыс абу, дерт, ма —
Видлӧдлӧ быд пӧлӧс кӧрӧн.
Кык берег ӧтвывтысь ва
Ловъя — вед визувтӧ, вӧрӧ.

Ассьыс став рӧм-сер оз восьт
Ӧтпырйӧн юыс лӧнь рытӧ...
Пласьтвидзӧ кык берег кост,
Быттьӧ, со, висьтасьӧ шытӧг.

Ме вылӧ медматыс кӧдж
Зымвидзӧ-видзӧдӧ ныжа:
Тӧдӧмысь, ю водзас тшӧтш
Ачым, кӧть муртса да, мыжа.

Юыслысь тыр эбӧс-мич
Ас кадӧ видзны эг тэрмась,
Ошки, а лэптыны кыдз, —
Индалысь йӧзкӧд эг вермась.

Сод менам вир-яйын вын!
Олӧмлӧн визув мем инмӧ,
Сьӧлӧмӧн эг вӧв мед кын,
Вӧлі мед пеля и синма.

Вынсьӧдны мед сьӧлӧм борд,
Пальӧдны меын поэтӧс,
Тӧлысьыс — важдырся ёрт —
Мӧдлапӧв рас сайысь петіс.

Кадсӧ оз весьшӧрӧ лот:
Регыд и ю шӧрас суніс.
Мыйлакӧ лӧзалысь от
Нӧшта на лоис сэк зумыш.

Тӧлысь, тшӧтш лов вылам вод,
Зэр дасьтысь кымӧрсӧ косяв.
Томлунӧй, кыдз пароход,
Увсянь ни вывсянь оз косав.

Видз, мортӧй, мывкыдтӧ видз,
Кутшӧм кӧть пивъяс эз лэбны,
Кыдзи тай юыс, мед сідз
Ассьыд збыль чужӧм не дзебны.

Юыс, и тӧлысь, и рас, —
Быдтор, мый чуксалӧ овны,
Нӧшта на дона да ас,
Нӧшта на муса
Пӧсь ловлы.

Сӧмын тай сайкалан сёр,
Сӧмын тай казялан дырӧн:
Олӧмас сымындатор
Кылалӧ,
Вошӧ —
И бырӧ!

Но мед и водзӧ, кыдз мем,
Ыльӧбӧн йиджӧ быд лолӧ
Ставыс, мый вӧвлі, мый эм,
Быдтор, мый ме бӧрти лоӧ.

1986