ТИМА ВЕНЬӦЙ!..

Ловлы вӧля! И кокниа
Восьлавсьӧ мем Чов ю пӧлӧн.
Падмӧм вӧр юыс —
Падмыштӧм нэмнымлӧн визула пас.
Арыс пӧльтӧ мем чужӧмам со
Тима Вень дырся тӧлӧн,
Кӧть и выль ногӧн шогалӧ
Талунъя рас.
Тима Веньӧй, и медлӧньнас
Лов вылам бушкола-тӧла:
Йӧзсӧ ӧтвывтысь дойыс
И менам тай сьӧлӧмам эм.
Сӧмын снимокыд серти
И ныр-вомтӧ тӧда,
Сӧмын гижӧдыд серти
И кыв-ворыд воссьылӧ мем.
Тима Веньӧй, пӧсь сьӧлӧма,
Тӧждысян синъяса ёртӧй,
Тэнӧ некор эг аддзыв —
Ог ловъянад аддзы и тась.
Уджач войтырлӧн кокъясӧн
Талявлӧм туйыс оз ор тай —
Чов ю йылӧдзыс туй визьыс
Менӧ тшӧтш катӧдны дась.
Тима Веньӧй, ни Тэнӧ,
Ни ачымӧс ньӧти ог такӧд,
Сэсся кутшӧм кӧть бинтъясӧн
Дойяссӧ кадыс оз тӧб.
Вынсьыд петін да, усин Тэ
Кӧнкӧ сэк татӧн вед, татӧн.
Но кӧн гуыд — и ас морт,
И ни ӧти сволочь оз тӧд.
Тима Веньӧй, век ӧшавны
Чов весьтас кымӧрлы-пивлы:
Медсэзь лун-войӧ морӧсам
Дзикӧдзсӧ сэзьдӧм оз ло.
Тэнад Муза да Авиа нывъяслы,
Воканлы-пилы
Ӧнӧдз, оз-оз да, мыччысьлӧ
Йирмӧгнас тась комын ӧкмысӧд во.
Тима Веньӧй, и Помӧсдін катыдын
Арнас зэв уналӧн кӧлысь.
Том выль гозъяяс шудысь
И тӧлысьлӧн гӧрдӧдлӧ бан...
Тэнад чужан и кувсян октябрь —
Тэнӧ баййӧдлысь тӧлысь —
Татчӧс кыдзьяссӧ куштӧ,
Мед восьсаджык вӧлі и тан.
Тима Веньӧй, быд нартлы ми
				ӧдзӧссӧ
Ныр улас крапнитам-сиптам,
Мед нин збыль вылӧ тӧдісны выль
				йӧз,
Кӧн — бур, а кӧн — лёк.
Сизим мыльк вылӧ нюжӧдчӧм
Помӧсдін сиктад
Мунысь-локтысьыс воысь-во содӧ,
Но некор нин ачыд он лок.
Тима Веньӧй, бур вӧлятӧ пыкӧмыс
Мем сэкся конвойтӧг сидзӧ...
Чов дор лэбулас пальӧдтӧм шогнад
И пальӧдтӧг узь...
Корнас шыбласьысь рас
Тэнсьыд ӧтдортӧм лов шытӧ видзӧ,
Тэнад Эжваӧ усьысь лӧнь Чов ю
Мед ловнас оз усь.

1990