ПОБЕДАНЫМКӦД ТШӦТШЪЯ

Война вылысь воліс том салдат,
Гортас воліс бурдӧдчыштны сійӧ...
А кор воис бӧрсӧ мунан кад,
Ёртным выльысь муніс косьӧ-биӧ.
Гӧтыр сійӧс колльӧдіс да мам,
Муса верӧссӧ да дона писӧ.
Вӧрзис пароходыс, ньӧжмыд, рам,
Бӧрсьыс колис ваткылясьысь гысӧ.
Вермӧмъясӧн восьлаліс боец,
Дзескыдмыліс враглы рытыввылыс,
Но лёк юӧр астӧгыс эз лэдз,
Воис юӧр ёртлӧн усьӧм йылысь.
Гӧтырлы и мамлы ӧти шог,
Донаторйыс кодзув моз кор кусӧ.
Сэсся некор на дорӧ оз лок,
Коді врагысь дорйис чужан мусӧ.
Тӧдчӧдны мед биа туйлысь дон,
Югъяліс Печора весьтын майыс.
«Вермим, вермим!» — триньгис телефон,
Сиктсаяслы шуда юӧр вайис.
Дзирдаліс Победа лун и сэн,
Шымыртіс став мусӧ ӧти праздник.
Дой и радлун кӧртасисны сэк,
Ӧти синва найӧс йитіс-разис.
Быттьӧ усьӧм ёртлӧн сьӧлӧм би
Ӧзйис-ловзис, некод мед эз вунӧд,
Сійӧ лунас сылӧн чужис пи,
Усьӧм ёртлӧн пи Победа лунӧ!
Праздник лунӧ кыдзи нӧ он шу
Быд выль ловлы-петаслы пӧсь чолӧм!
Вешйы тась да разав, ковтӧм ру.
Ыджыдав да дзоридзав тэ, олӧм.
Выль салдат, выль гражданин, выль зон
Тайӧ помтӧм мирнӧй енэж улын
Быдмис-сӧвмис, авъя, зумыд, ён,
Кӧть и батьтӧг лэптіс чужан муным.
Чужан муӧд кытчӧ кӧть оз мун,
Мирнӧй тӧвру лэбӧ сылы паныд.
Сылысь чужан лун — Победа лун —
Сыкӧд ӧттшӧтш пасйӧ став странаным.
Асьсӧ бурӧн нимӧдӧ мед нэм,
Мед нейтроннӧй бомбаӧн оз тшӧтясь.
Олӧмас и сьыланкывйын эм
Ёртыс, код Победанымкӧд тшӧтшъя.

1985