НӦШТА ӦТЧЫД МАМӦЛЫ

Ӧшинь ув кыдзным быд корйӧн
		мен быттьӧкӧ шпорӧдӧ-ӧвтӧ:
Код тӧдас, мый дыра кежлӧ
		ме эновта тась гажаин?
Лысваӧсь турунӧд
		быттьӧкӧ тувччалан кӧмтӧг,
Вывланьӧ гӧгыльтчысь шондіыс
		ёрӧ тэн син.
Быттьӧкӧ кутлін на менӧ
		да окыштін пӧся,
Сулыштін сідз —
		морӧс бердсьыд
			эн другысьӧн лэдз.
Кодлы нӧ мамыдлӧн мелілун,
			зонмӧ, оз лӧсяв?
Туйӧ кор петан,
		сэк нӧшта нин лов вылад сэзь.
Быттьӧкӧ Кыдзкарӧ волі —
		со, янсӧдча выльысь.
Ӧдвывсьыс туй костӧс
		дженьдӧдлас Аэрофлот.
АН-двалӧн борд улын
		югнитас гыалысь выныс —
Муса Печоралӧн,
		ар нин да, чусмыштӧм от.
«Гижышт жӧ, мунан да, —
		корӧмӧн быттьӧкӧ шуин, —
Кузясӧ, гижлывлан кыдзи тай,
		оз вед и ков.
Лёк мед эз вӧв, —
		нӧшта содтін на, —
				гортад и туйын.
Семьяад бурӧн
		и йӧзас сэн лӧсьыда ов...»
Бара на, бара на
		тавой тэ вӧтӧн мен усин:
Йӧр сайӧдз колльӧдін —
		прӧщайтчан кывнад эн дойд.
Садьми да — зэрӧма,
		кокньыдик ру кайӧ мусянь.
Ӧшиньӧд визьнитіс,
		синва моз,
			югъялысь войт...
Збыль вед, тэ мунлін нин му вывсьыс,
		мунлін нин, мамӧ...
Тайӧ и дум вылӧ
		вӧтнам оз усьлы — и пом!
Пыр менӧ мӧдӧдан, ловъя,
		и ылӧ, и матӧ.
Вежӧдысь ді вылыс —
		коркӧся аэродром.
Син дорсьым унзільӧс
		ки мышнам ниртышті-вешті.
Ӧтиысь полі: эн лэбовт на,
		аддзылӧм вӧт!
Асылыс, коді, со,
		шевгӧдчис Сыктывкар весьтӧ,
Кытчӧкӧ вайӧ пӧсь югӧр,
		а кытчӧкӧ-й — слӧт.
Оз тай нӧ быдлаын
		ӧтпырйӧ югыдыс ыльгы:
Шудыс тай киӧ оз ӧтмоза
		быдӧнлы лок...
Вӧтӧ мый усис мен, мамӧ,
		вӧт вӧлі да збыль кӧ!
Чайтла на: мӧдысь кӧ овны мен,
		кадсӧ эг сідз эськӧ лот.
Чайтла на...
Мый эськӧ кыптыштӧм ловнад
			он чайт да!
Шань войтыр костас
			и лёкпозйыс тырмымӧн эм.
Асыв, ас рунад тэ
		кӧсйӧмӧс менсьым эн саймовт:
Помӧдз мед морт
		аслыс морт нога
			лӧсьӧдіс нэм!
Сьӧлӧмам лӧнь кодь на...
		Вӧрзьӧдны некод эз вевъяв.
Но гыа мирсьыс
		он некытчӧ пышйы, он мун.
Лов, кодӧс козьнавлін, мамӧ,
			мед некор оз везъясь,
Морт нимсӧ кыпӧдысь косьӧн
			мед тырас быд лун.
Кыдз тай Печораті пыжа —
			сьӧд кымӧр, со, сэтӧн
Дышпырысь кывтӧ;
			кӧн берегыс аслас — оз тӧд.
Ышловзя: выль лунсӧ панӧм —
			кыдз выль туйӧ петӧм.
Асывсянь серпасыс ӧти,
			а рыт помын, казялан, мӧд.
Олӧмлысь, мамӧ,
		ме дзик ӧти льгота и кора:
Серпасъяс вежлаліг,
			муннысӧ дыр на мед, дыр.
Олӧмыс ачыс,
		кыдз мусюрӧдз ойдӧм Печора,
Сӧдзсӧ и гудырсӧ
		йӧз водзын эрдӧдӧ пыр.
Сьыланӧй тэчсьӧ кӧ —
		ӧтнамӧн ме абу ӧтка:
Гӧгӧрбок — ёртъяс,
		оз кокниа пузьы кӧть гор.
Кытысь нӧ кокниыс,
		веськодьӧн лоны он мӧд кӧ?
Сьӧкыдджык овнысӧ,
		ачымӧс кокньӧдла кор.
Морт рӧдлӧн нэмӧвӧй гажлуныс
		оз вед и орлы.
Радио ворсӧ, со,
		олӧмті восьлалан марш.
Колльӧдан туйӧ
		и сэтысянь кымынысь дорвыв!
Вӧтнам ог лок,
		а пыр муна — тэ ӧзйӧдан гаж.
Весиг и сэтысянь
		ме вӧсна майшасян ӧнӧдз.
Му вылас ас мунан туйысь
			мед бокӧ эг кеж!
Нэмӧйлӧн асывкӧд кыпалысь воясӧй —
					кӧнӧсь?
Томлуныс, мам моз жӧ, ӧти —
				и выльӧн он веж.
Войтырлӧн ӧтласа шудӧн
			и ме ола-выла,
Быд сикас майшасьӧм
			топӧдӧ кӧть морӧс куд.
Йӧзлысь кӧ шогсӧ и радлунсӧ,
			ассьым моз, кыла,
Сідзкӧ, ме тӧда,
		мый сэтшӧмыс мувывса шуд.
Эськӧ и найӧс тшӧтш
			ас сьӧлӧм вылнаӧдз лэпта,
Вошӧм кодь коді,
			но морттуйыс дзикӧдз эз кус.
Юр вылам чатӧра шляпа
			кӧть боквывтӧм кепка, —
Юрӧс ог уськӧд
		ни быдӧнысь вылын ог кут.
Бур вылӧ лачаӧс
		весиг и гулюыс ӧзтӧ,
Коді балконсянь, со,
		ме вылӧ дзоргӧ, кыдз ёрт.
Быдтор, мый менӧ тшӧтш
		йитӧ мӧд муяскӧд,
			мӧд кывъя йӧзкӧд,
Асылысь асылӧ вынсьӧдӧ мед ассьыс борд.
Чужан му!
Сьӧлӧмӧ гым-чард и лӧньтассӧ пыртысь!
Тэ дінӧ шыӧдчан-чукӧстчан кывтӧг ог ов.
Асывлы, выль туй кост дасьтысьлы,
			морӧслӧн кывтысь
Сьыланӧс тэ нимӧн мычча,
			кыдз гӧстьлы — нянь-сов.
Мед нӧ быд асывлӧн дзоридзӧн —
			мам нюма мичӧн —
Сьӧлӧмным тырӧ.
			А тайӧ оз кокниа шед.
Мамъяслӧн муслуныс
			миянӧс шыбӧльысь видзӧ,
Мамъяслӧн муслуныс
			миянӧн веськӧдлӧ мед!

1987