ШОГСЬӦНЫ ВЛАДИМИР ИЛЬИЧ ПОНДА

Январ бӧръя лунъясӧ Читаевын вӧлі крестьяналӧн чукӧртчылӧм (конференция). Нинӧм виччысьтӧг воис юӧр т. Ленин кулӧм йылысь.

— Ыджыд шог суис миянӧс, уна миллион крестьянаӧс, рабочӧйясӧс, мувыв эмбуртӧмъясӧс (пролетариат). Сьӧкыд шог суис миянлысь Республиканымӧс: эз ло медмуса мортыс миян костын, кусі, кулі дона Владимир Ильич Ленинным, Революциянымӧс нуӧдысьным. Быри дыр висьӧм бӧрын, — шогсьӧны Читаевса крестьяна. Уналӧн доршасьӧ синваыс, чышкысьӧны, кашкӧны. Шога, шога сьылӧны муса Ильичлы гувыв сьылӧм (похоронный марш).

— Но мед оз радлыны мувыв буржуйяс миян шоглы. Ми тӧдам став кӧсйӧм-колӧмсӧ Владимир Ильичлысь! Миян партия Союз Съездъяскӧд кужасны дорйыны миянлысь рабочӧй-крестьянскӧй олӧм, кужасны отсавны мукӧд муын рабочӧй-крестьяналы шыбитны сэтчӧс буржуйяссӧ.

— Чолӧмбыттьӧ Коммунист Партиялы, Роч мувыв Союзса Съездлы!

Надейтчӧны, сьӧлӧм гаж аслыныс сетӧны и кепыльтчӧны партия гӧгӧр, Сӧветъяс гӧгӧр Читаевса крестьяна.

Пемыд войӧдз на костын сёрни мунӧ Ильич йылысь, Революция йылысь, крестьянство йылысь, важ косьяс йылысь.