ГӦРД АРМИЯКывзылӧй ті! Тайӧ — тӧвлӧн шыыс. Кывзылӧй ті! Тадзи муралӧ гым. Тайӧ — чардбиысь гартчӧны кывъяс, Тіянлы висьтавны вермасян вын. Кывзылӧй ті! Тайӧ — му вӧран тӧвлӧн Ылісянь пыдысьмоз кылыштӧ шы. Тайӧ — пасъям история книгаӧ ми Скӧр кадлысь чорыд лыдпасъяс. Кольӧма дас куим во; Кадыс ӧд сё воысь мича да вылын. Тайӧ — Гӧрд Армиялӧн туйпом, Гырысь победаыс сылӧн: Тышъяс, Походъяс, Туйяс, Косьяс. Быдсяма вӧрзьӧдчӧм чорзьӧдліс ки, Быдсяма кыпӧдчӧм ӧддзӧдліс воськов, Быдсяма кыпӧдчӧм ярмӧдліс би. Кымын ёнджыка дзескавліс кадыс, Сымын сюсьджыкӧсь лолім дай ки-кок эз лег! Оз! Оз ло кусыньтӧм враг водзын косъяс! Оз! Некор миянӧс врагыд оз чег! Мед найӧ саридзьяс сайсянь, граница сайсянь Сӧветскӧй мулы пыр сиӧны казнь, — Ми быдӧнлы шуам, код тышкасьны сюйсьӧ: «Ог панӧй ми кось, Но кось вылӧ дась!» Водзӧ и водзӧ пыр шавксьӧдам гора, Бӧрланьӧ бергӧдчӧм некор оз ло! Ми дорам, Ми дорам, Ми дорам, Дорам нин дас куим во! Дас куим во — тайӧ сӧмын на нырыс, Тайӧ кыпӧдчӧ выль оланног, Но юр вемӧ чорыда пырис — Оз вунлы дас сизимӧд во! Кӧдзыд из пӧвстса вольк Петроградын, Пуан Мӧскуа карын тшӧтш сэк, Джуджыд гӧрбъяса баррикад радын Сэк история ӧзтіс выль свет. Гызьӧма уджалысь йӧзлӧн колонна, Быттьӧ вӧрзьӧдчис кылавны йи. «Сами набьём мы патроны, К ружьям привинтим штыки!» Буретш сэки вот первойысь сувтіс Став рабочӧй, крестьянин, салдат, Сэки первойысь шусьыны кутіс Красногвардейскӧй отряд! Топыда гартчисны радъяскӧд радъяс, Бордъясӧн шпорӧдчис гӧрд рӧма знамя. Ылӧджык, вылӧджык, водзӧджык пыр, Гӧрд знамя корӧмӧ кӧсйысьӧм тыр. Топыда гартчисны радъяскӧд радъяс, Чорыда йитчисны сиктъяс да каръяс, Гӧрд знамя лэбалӧ, индалӧ ныр, Ылӧджык, вылӧджык, водзӧджык пыр, — «Смело мы в бой пойдем За власть Советов, И как один умрём В борьбе за это». Со мунӧны лёк турӧб туйӧд. Кӧть гӧгӧр тшыг, кӧть гӧгӧр кын, Но сьӧлӧм збой, пӧсь вирныс пуӧ, Гӧрд кодзув на ордысь оз мын. Со мунӧны... лёк киссьӧм паськӧм, Сідз эновтісны гортса удж. Быд боксянь видзны Сӧвет властьӧс Гӧрд гвардиялӧн кыптіс руж. А налы паныд резӧ косьӧн Лёк тӧв и слӧт, и свинец бытш. Сідз дас кӧкъямысӧд восянь Пыр топаліс страшнӧй би кытш. Лёк еджыдъяс люзьгисны миянла дорӧ Няйт, гырд сора гудыртчӧм шорӧн. Сэн уна йӧз вӧлі: Корнилов, Краснов, Колчак, Деникин, Полякъяс. Пурсян пон чукӧр кавшасис-локтіс, Пиньяссӧ курччӧмӧн, равзігтыр лёкысь: «Эк, яблӧгӧй, зіля чергӧдчы, Гайдамаклы кӧ сюран — бӧр он бергӧдчы». «Мундир английскӧй, Погон российскӧй, Сапӧг японскӧй, Правитель омскӧй, Эк, шарабанӧй американскӧй!» Сэк друг, быттьӧ гымньӧв сэн кырыштіс — зурс! Друг ори лёк равзӧмныс налӧн. Выль гӧлӧсъяс кылісны уна сё сюрс Дай вевттисны Интернационалӧн. Сэн вӧрзис Гӧрд Армия враг вылӧ збойпыр Сьылӧмӧн, сьӧлӧмыс пӧсь: «Сувт, чеччы ёрӧм-дорӧм войтыр, Сувт, тшыглы кулысь, бӧрдысь йӧз!» Топыда гартчисны радъяскӧд радъяс, Бордъясӧн шпорӧдчис гӧрд рӧма знамя, Ылӧджык, вылӧджык, водзӧджык пыр. Гӧрд знамя корӧмӧ кӧсйысьӧм тыр. Топыда гартчисны радъяскӧд радъяс, Чорыда йитчисны сиктъяс да каръяс, Гӧрд знамя лэбалӧ, индалӧ ныр — Ылӧджык, вылӧджык, водзӧджык пыр. Мый тайӧ? Сьӧлӧмӧ полыштӧм пырӧ, Штабын телефон звӧнитӧ — звынн! — Будённый полякӧс Варшавалань зырӧ. — Варшава оз мын! Мый тайӧ? Вӧв кок шы гыпкӧ зэв топыд... Врангельлысь поткӧдам зоб! — Кывзы тэ, кывзы, Европа, Оз мын Перекоп! Мый тайӧ? Сьылӧм пыр паськалӧ, ӧддзӧ. Донӧсь винтовкаяс, шатлалӧ враг. — Бандитъясӧс Сибирысь ӧдйӧджык вӧтлӧй. Оз мын и Колчак! Му путкыльтан тӧв ныр моз лэбисны водзлань, Быд фронтлӧн сэк чегъясис рӧч, — Рытывлань, асывлань, лунлань и войлань Лёк врагъясӧс вӧтлісны прӧч. Сідз чорзьӧдчӧмӧн враглысь вынсӧ орӧдім, Быд пельӧсын гӧрд югыд знамя шпорӧдӧ. Вай ворсӧй ыргӧн трубаяс, Победаысь ми шудаяс, Дыр кежлӧ Чӧв ланьтліс война шы. Джаг гӧрӧдыс разьсис шог вояслӧн скӧнь. Чӧв ланьтісны воюйтан гымъяс. Сӧветскӧй Союзлӧн оз личавлы сӧн, Бур кад кежлӧ быдмӧны вынъяс. Сӧмын бур ӧдӧн кыптӧмным вылӧ Лӧга дзоргӧны лёк йӧз. Вирӧн, ньылӧмӧн мыськалӧм му вылӧ Быд здук ӧшӧдчӧ воддза моз грӧз. Ыджыд кытшола Сӧвет граница гӧгӧр Капиталистъяслӧн кесйӧдлӧм ног Лёкысь дугдывтӧг пӧльтӧ война би ӧгыр Гусьӧн и явӧ кавшасьысь враг. Ми тӧдам донсӧ пеж сёрниа йӧзлысь, Мед дуль сорӧн вомсьыныс лювгӧ лӧж. Ми тӧдам, Лига наций мир йылысь сӧрліс, А ӧнӧдз на вӧчліс пыр пеж. Налы бара нин ковмисны вир кисьтан тышъяс, Миян быдмӧмысь найӧс топӧдӧ дрӧж. Но, мый нӧ? Ми дасьӧсь, ог лӧсьӧдӧй мышъяс Дай воча кыв оз ло теш. Кывзы, команда! Кылан — эн узь! Кылан — эн узь! Да сюсьджыка синъяснад дзоргы. А ковмас кӧ, ӧтпырйӧ уна сё сюрс Сэк гольскӧбтас пищаль затворӧн. И бара Гӧрд Армия зэвтлас вын, Сӧветскӧй му дорйыны петас. Сэк врагъясӧс курӧдас война тшын — Гӧрд Армия звӧн налы сетас. Но кӧть кӧн, став му шар пасьта Дзик быд лун и дзик быд час Ӧтув сувтны вынсӧ дасьтӧ Миян отсӧг — став рабочӧй класс. Партиякӧд ӧттшӧтш, пыр ӧддзӧдан ӧдӧн Мыччысьӧм кыалы паныд тэ пет! Югыдлань нуӧдны туй визьсӧ тӧдӧ Ленинлӧн партия — ВКП (б). А ӧнісӧ восьлалам кыпӧдчан горӧн, Мый перйим — бӧр сетӧм оз ло! Ми дорам, Ми дорам, Ми дорам, Дорам нин дас куим во! Миян Гӧрд Армия — удж видзысь вын, Некор оз жугыльтчы, бӧрлань оз мун. Миян Гӧрд Армия врагысь оз пов, Мирнӧй удж дорйыны быд здук гӧтов. Ми косьяс тӧдлывлім, Быд врагӧс нӧйтлывлім, Оз песовт миянӧс лёк враг, Чорыдӧсь сойяс, Сулалам збоя, Юр водзын ӧзъялӧ гӧрд флаг. А наян враг кӧ бара лёкысь сюйсяс, Ми рӧсплохӧ ог шедӧй, лоам дась. Гӧрд армеецъяс, видзӧдӧй сюся, — Ог панӧй ми кось, Но кось вылӧ дась!.. Кывзӧй, команда, Вай топӧдӧй рад! Тӧдам ми могнымӧс, тӧдам рад. Ми огӧ повзьӧй, мед кавшасяс враг, Сы водзӧ некор ог уськӧдчӧй пласьт — Морӧсӧн видзам пыр Сӧвет власть. Ми збоя восьлалам, Быд врагӧс водзсалам, Гӧрд знамя уськӧдӧм оз ло! Видзӧдам сюся, Некор ог узьӧ, Мунім нин тадз дас куим во.
