МАЙ 1 ЛУНОшкамӧй ыджыд лун — Май первой лунӧс, Праздник лун уджлысь да мездысян лун! Ошкамӧй ыджыд лун — Май первой лунӧс, Вӧлялысь, тулыслысь, дзоридзлысь лун! Чойясӧй, пасьталӧй венчайтчан платтьӧ, Алӧйгӧрд цветъясӧн мичмӧдӧй сад! Сывтырйӧн кутчысьӧй вокъяскӧд, батьяс — Кольӧма шогсьӧмлӧн-бӧрдӧмлӧн кад! Нимкодя петалӧй праздниклы паныд Фабрикысь, заводысь, сиктъясысь йӧз; Гажаа гажӧдчӧй ӧтвылысь ставныд, — Шондіыс югъялӧ, енэжыс лӧз! Гажаджык — сьылысьяс! Вылӧджык — флагъяс, Ошкамӧй ыджыд лун — ӧтувтчан лун! Нэм кежлӧ тӧвзисны озыръяс-врагъяс, Ошкамӧй ыджыд лун — Май первой лун! 1925
