«СЭНІ КӦМТӦГ ОЛАС»

Аръявыв кулӧма гӧлиник морт,
Кольӧма сы бӧрын дӧва да семья.
Суседъяс вӧчисны шонъянлы горт.
Дӧвалӧн грӧш абу дзебнысӧ сьӧмыс...

Поп ордӧ, коньӧрӧй, муніс зэв шог;
Кикарсӧ окаліс, кевмысьӧ-полӧ:
— Тэ дінӧдз, батюшко, зэв ыджыд мог:
Мужикӧй кувсис да гуавны колӧ...

— Тӧдӧмысь, гуавны лоӧ морт шой, —
Небыдик гӧлӧсӧн батюшко шуӧ, —
Вичкоын, колӧкӧ, узьтӧдам вой,
Колӧкӧ, колльӧдам сьылӧмӧн гуӧдз...

— Дерт, эськӧ колӧ да, сьӧмсӧ эз коль...
Кыдзкӧ нӧ уджӧнсӧ оз-ӧ позь дзебны?..
Уджала мӧдысь лун куим-ӧ-нёль...
Ӧні дзик нинӧмӧн ма куття ньӧбны...

— Сьӧм понда весьшӧрӧ норасян тэ, —
Кытысь нӧ гӧльяслы сюрсъяссӧ чӧжны?
Сьӧм йылысь кыв эг шу весиг и ме,
Позьӧ на мыйӧнкӧ мӧдторйӧн вежны.

Дӧваӧн олігад сытӧг нин шог,
Сэсся ӧд тэнад и челядьыд уна...
Кыдзи нӧ сьӧм босьтны?.. Избави, бог!
Сирӧта челядьлысь ог жӧ кут гуны!..

Помнитсьӧ, мужиктӧ дарйӧдігмоз
Кӧтшассьыд аддзылі, син пыр мем муніс,
Быттьӧкӧ вӧлі сэн выль сапӧг гоз...
Сьӧм вӧсна эн шогсьы, нинӧм и шуныс...

Аскинас мӧдӧдчис шлячкыны слӧт.
Кулысьӧс гуавны колльӧны няйтӧд;
Водзвылас, выль кучик сапӧга, пӧт,
Шавксьӧдӧ поп да быд «бурсиӧм кайтӧ»...

Горт бӧрся, сӧнікӧд кӧмтӧгныс — ок!
Келӧны челядьяс, накӧд тшӧтш мамныс,
Гусьӧник бӧрдӧны... пиалӧ кок.
Кодъяс и жальӧсьджык: асьныс-ӧ, батьныс?

1925