«ЯГМОРТ»-ЫСЬГрездӧ локтіс юӧр Ягморт висьӧм йылысь, Да эз дзонь лок; сійӧс Тӧв ныр вайис ылысь. Сайдтӧмлы туй абу; Веськыда оз лый, Люкасьӧ быдторкӧд, Массааджык мый. Бергалӧ и изӧ, Лыа быглялӧ, Быдся пельӧ сюйсьӧ, Фат моз шутьлялӧ... Изӧм юӧр грездын Тӧв ныр шутёвтӧма Медводз пӧчлы, коді Важӧн пельтӧммӧма. Оз кӧть гӧгӧрво нем, Ёна пӧчӧ повзяс, Сы вылын том йӧзлы Сералыштны ковзяс. «Мый тэ дурскан ковтӧг? — Шуалӧны пӧчлы: Кодыр лёк пон висьӧ, Сэки-й овны кӧчлы». Кыдзи ворсанінын Гажа Помӧздінын; Некод оз тӧд поз; Ӧтилаӧ, кылӧ, Корӧ ывла вылӧ Юӧр джынъян моз. Сэні шмыньялӧны, Сэні окасьӧны... «Висьӧ! Мый он бӧрд?» — «Висьӧ, — мӧдыс шуӧ: Ловъянас ог суӧ... Кыдз нӧ коляс сьӧрд?» «Кодыр сысянь орим, Ёна сійӧс ёрим; Ӧні ӧвсьылам; Кулӧмнас тай мездіс Быдся шогысь грездӧс; Бурӧн кодралам». — «Ме ог гарав мыжсӧ, Вундышта ме гыжсӧ, Мед сы эбӧс-вын Коляс тӧд вылын». — «Коді кыскас сӧнсӧ? Кепысь вылам гӧнсӧ Нетшка пель дінсьыс, Кор сідз лӧсяліс». «Мый нӧ, вокъяс, колӧ мунны! Сэк кості, кор кывбӧритам, Коньӧр Ягморт сісьмас тут, И он сибав сы дінӧ». — «Колӧ мунны, колӧ-й нуны Мыйкӧ ошйысьӧмысь ӧтар. Эй, мед куш киа эз вӧв Некод! Босьт код чер, код ньӧв. — «Кыдз нӧ мӧд ног? Абу морт тай, Сійӧ вермас ловзьыны». — «Муса вокъяс, шаньджык, ме ног, Ӧні гортын кольччывны, Мед ми кувнысӧ ог торкӧ... Кулас жӧ ӧд сійӧ коркӧ! — «Кыдз тэ тӧдан, мый эз кув?» — «Ме ог тӧд, мый сійӧ куліс». — «Вокъяс, каттьӧ сылысь сюв, Сэсся вӧлись шуӧ: «куліс». — «Да и сэк на тшӧкмунанныд Кыв джын вылад! Ягмортлӧн, Тӧданныд кӧ, быд сюв ловъя, Миян голяясным гӧгӧр Сійӧ ачыс каттьысяс И быдсӧнӧс джагӧдалас. Сылӧн пиньяс чеччыштасны Анъяссьыс и сатшкысясны Миян яй-лыясӧ пыдӧ. Коді аддзас Ягморт шой, Сылӧн синмыс пондас висьны; Коді кылас Ягморт ним, Сылӧн бырас пельсадьыс». Веськыд кыв и сӧрӧм Сідзи сорласисны; Кывзыны нем лоис — Бур йӧз разӧдчисны. Кыдзи дзебанінын Гажтӧм Помӧздінын, Пӧдласьӧм быд чом, Чӧв олӧ быд вом. [1873 — 75]
