КӦИНА-КАНЯ

Вӧралысьяс понъяснас
Вӧтлысисны Кӧин бӧрысь.
Кытчӧ вошсян? Петмысьт вӧрысь
Кӧин грездӧ котӧртас.
Грездын аддзӧ: пывсян вылӧ
Чикыртчыштӧм мича Кань.
«Васька, — Кӧин шуас сылы, —
Висьтав, код тан медся шань?
Йӧз шы со и пон шы кылӧ:
Тайӧ — менӧ корсьӧны;
Код ордын мем дзебсьыны?
Коді бура шонтӧ-й вердӧ?»
— Регыдджык мун Степан бердӧ —
Зэв бур мортыс! — шуӧ Вась.
«Сідз, да сылысь баля пурлі».
— Бур йӧзӧс, дерт, аддзан тась.
Демьян ордӧ мун! — «Да сюрлі
Пинь вылӧ мем сылӧн меж».
— Трӧпим дінӧ кодыр кеж! —
«Чӧв, чӧв! Кукань кули сылысь,
Лӧгалӧ нин мӧймусянь!»
— Лӧсьыдтӧм жӧ! Климӧ пилысь
Корлы лэбув. Зонмыс шань! —
«Васька, Васька! Клим вуж — моръяс!
Уськӧді ме налысь чань!»
— Но-й-нӧ, коді тэнӧ доръяс?
Аддза, зэв жӧ ачыд ёсь;
Быдсӧнлы тэ дӧзмӧдӧмыд;
Мый тэ пуктін, сійӧ-й бось,
Вунды, мый тэ кӧдзлывлӧмыд.

1859