Му бергалӧм

Позис кӧ эськӧ му вылад шонді вывсянь видзӧдлыны, муыд дзик чир ыдждаӧн кажитчис.

Босьтам кӧ ӧти тусь проса шыдӧс да сы бокӧ кисьтам дас куим ведра проса шыдӧс, сэки позьӧ шуны: со пӧ этійӧ муыс (ӧти шыдӧсыс), а этійӧ шондіыс (шыдӧс чукӧрыс). Миян чир ыджда муным вошӧма лыдтӧм-тшӧттӧм шонді пӧвстын, кодъясӧс, ӧтиӧс кындзи, ми шуам кодзувъясӧн.

Вермас-ӧ сідзи лоны, мый сэтшӧм ыджыд шонді да миллион сыысь ыджыд шондіяс кытшлалӧны му гӧгӧр? — Тӧдӧмысь, оз. Оз шондіыс му гӧгӧрыс ветлы, а муыс, ас гӧгӧрыс бергаліг, кытшлалӧ тшӧтш шонді гӧгӧр.

Заводитлӧй жӧ бергавны джодж шӧрын ӧтилаын да видзӧдны пыр веськыда водзӧ. Сэки тіянлы кажитчас, быттьӧ став стеныс и, серпасъяс и, ӧшиньяс и, — быдтор тіян гӧгӧр бергалӧ, тіянлы паныд мунӧ. Либӧ пыжӧн мунігӧн, ӧдйӧ вӧлӧн мунігӧн ли — видзӧдны пондан берегӧ либӧ туй вылӧ да, — быттьӧ пыжыд да телегаыд ӧтилаын сулалӧны-а, муыс тіянлы паныд зэв ӧдйӧ мунӧ. Му бергалӧмсӧ ми огӧ казялӧй, ӧти-кӧ, асьным сыкӧд тшӧтш бергалам да сійӧн, мӧд-кӧ, сійӧ шлывгӧ зэв лӧня, лабутнӧя: трук ни трак некытчӧ. Некутшӧм шы абу ни. Весиг тӧлыс абу: ӧд му гӧгӧрса тӧлыс тшӧтш муыскӧд бергалӧ.

Кыдзи нӧ либӧ му бергалӧмсӧ тӧдісны?

Сійӧс петкӧдлӧны миянлы шонділӧн да кодзувъяслӧн бергалӧмыс.

Быд суткиӧн муыд ӧтчыдысьӧн бергӧдчӧ ас гӧгӧрыс, сыкӧд тшӧтш быд сутки ми мунам уна км. Тӧдӧмысь, кымын матын мушӧрвӧньланьӧ, сымын сійӧ туйыс ыджыд. Ленинград гӧгӧрсаяс быд суткиӧн мунӧны 19.200 км. Сідз кӧ, тӧдлытӧг быд суткиӧн ставным ми мунам пӧшти кӧкъямыс пӧв уна медбур машинаысь.

Муыд кытшлалӧ шонді гӧгӧрыс зэв ыліті: 147.246.000 км сайті. Мӧвпыштӧй жӧ, мый ыджда кытш муыс вӧчӧ. Сійӧ кытшӧд шонді гӧгӧрыс муыскӧд ми тшӧтш лэбзям и, вывті ӧдйӧ, пуляысь ӧдйӧ: быд секундӧн комын кык км. Ӧдйӧ тай эськӧ лэбзям да, дыр жӧ тырмӧ кытшовтныс: дзонь во — тулыс, гожӧм, ар дай тӧв.

Му бергалӧмтӧ казялӧма Коперник, 400 во сайын.