Рыт да асыв

Бара мачнаным велӧдчам. Буретш лун шӧр кадын опыт вӧчам. Лӧсьӧдам мачнымӧс сідзи, мед миян республиканым лоӧ югдӧдӧм инас шӧрас. Ӧні видзӧдламӧй, мый му мӧдарас, медпемыд инас? (Сійӧ интаснас лоӧ Ыджыд океан). Тӧдӧмысь, вой. Пасъям сэті крестӧн.

Лун да вой миянлы сюри. Вайӧ корсямӧй рыт да асыв кӧні. Зэв кокни гӧгӧрвоны, мый найӧ пемыда-югыда вежтасасӧсь. Сійӧ вежтасъясас буретш лоӧны: ӧтарас — Америка, мӧдарас — Азия. Кодарас асылыс? Кодарас рытыс? Медым рыт-асывсӧ тӧдмавны, тӧд вылад вайӧдӧй му бергалӧмсӧ: асыввывланьӧ, веськыдкивыв сійӧ бергӧдчӧ. Ньӧжйӧникӧн мачтӧ бергӧдӧй веськыдкивыв да кыйӧдӧй, кодарӧ — югыдланьӧ али пемыдланьӧ — вешъяс Азияыд. Ті казялад, сійӧ мунас пемыдланьӧ, вуджӧрӧ пондас пырны. Сідз кӧ, Азияын лоӧ вой, а войыд рыт бӧрын овлӧ. Мӧдарсяньыс — Америкаыд — югыдланьӧ мыччысьӧ: сэні шонді петӧ — асыв.

Медым тайӧ юрад бурджыка пуксяс, мед оз вун, кыдзи тӧдмавны, кӧні лун, вой, асыв либӧ рыт, татшӧм видлӧмсӧ унаысь вӧчӧй. Босьтӧй, шуам, Америкаын мед лун вӧлі. Сы серти сэсся висьталӧй, кӧні сэки вой, асыв, рыт.

Вӧчӧй со кутшӧм опыт и. Пуктӧй мачад, кӧні ті олад, чут. Лӧсьӧдӧй сэтчӧ лун шӧр кад. Ньӧжйӧникӧн бергӧдӧй мачтӧ веськыдкивыв. Тіян чутыд войдӧр вуджӧрӧ пырас (рыт да вой лолӧны), сэсся мӧдарсяньыс бӧр югыдӧ петас (асыв лоӧ).

Тадзи видлалӧмӧн ті казялад, мый быдлаын му вылын аслас кад. Миянын кӧ лун шӧр кад, миянысь асыввывланьын сёрджык нин. Мӧдарӧ, миянсянь рытывланьын водз на, лун шӧр кадыс на ещӧ абу.