ЧЕРЕШНЯ
Ӧтчыд Иисус да вежа Петыр ветлӧдлісны му кузя: Петыр мунӧ водзын, а Иисус сы бӧрся. Петыр аддзис эськӧ туй вылын куйлысь вӧв подков, но сійӧ вӧлі зэв важ нин, дзикӧдз шылясьӧма, — Петырыд сійӧс эз и лэпты. Колис туй вылын куйлыны. А Иисусыд, кор матыстчис вӧв подков дорӧ, эз дышӧдчы, копыртчис дай лэптіс сійӧс.
Регыд воисны найӧ ӧти сиктӧ. Сэні Иисусыд вузаліс ӧти грӧшысь подковтӧ ӧти еврейлы, коді важ кӧлуйӧн вузасьӧ.
Сэсся ветлысь-мунысьяс водзӧ мунісны. Шонді вылӧ нин кайис, кор мӧд сиктӧдз налы коли туй джын на. Петыр то шонді вылӧ видзӧдлас, то кывзӧ, оз-ӧ жыннян шы кывсьы — зэв жӧ ёна сійӧ тшыгъялӧма. Друг тыдовтчис башня. Петыр ёна радлыны пондіс. Ладмӧдіс кыкнан кисӧ син дорас, медым бурджыка аддзыны, да пондіс видзӧдны, сӧмын видзӧдӧ оз вичко вылӧ, а пач трубаяс вылӧ: кутшӧмысь тшын петӧ. Сӧмын ни ӧти трубаысь тшын эз нин пет, сы вӧсна мый сиктас пажын бӧрас став тасьті-паньсӧ мыськалӧмаӧсь нин дай пӧимсӧ весалӧмаӧсь. Коньӧр Петырыдлӧн эз нин вӧв лача весиг пажын коляс вылӧ.
Кодыр найӧ воисны сиктӧ, Петырыд сэтшӧма жугыльмис, весиг паныдасьысьяс вылӧ оз видзӧд. Сӧмын вичко водзын, кор пернапас чӧвтіс, бокӧ видзӧдліс. Видзӧдӧ, а пу улын сулалӧ черешня тыр телега. А Петырлы тайӧ и колӧ. Юаліс Петыр Иисуслысь, эз-ӧ вошты сійӧ грӧштӧ. Велӧдысь юрнас довкнитіс да матыстчис телега дорӧ. Ёна и радліс Петыр, кор ӧти грӧш вылӧ налы сетісны чышъян тыр ягӧд: нинӧм оз аддзы, нинӧм оз кыв радысла, сӧмын водзӧ мунӧ.
Ӧні найӧ мунісны тадзи: водзын Мезӧс, сы бӧрся кыссис сылӧн тшыг велӧдчысьыс, коді пыр виччысис, кор найӧ сувтасны шойччыштны да черешня сёйыштны. Виччысис сійӧ, виччысис да друг: хоп! Ёкмыльсьыс усис ӧти тусь. Петыр копыртчис, лэптіс да бусӧсьсӧ и сёйис. А Иисусыд пыр сувтлытӧг мунӧ да мунӧ водзӧ, а розьӧсь ёкмыльсьыс ӧти-ӧтиӧн усялӧны тусьяс да усялӧны, ставыс улисӧсь, мичаӧсь. Кодыр усис медбӧръяыс, Петырыд пӧтӧма нин вӧлі. Сэки Велӧдысь бергӧдчис да тадзи кутіс вӧйпӧдны ассьыс велӧдчысьсӧ:
— Ок, Петыр, Петыр! Мӧдысь лэпты кӧть медся туйтӧм важ подков! Тэ кӧ эськӧ сэки эн дышӧдчы, ӧні эськӧ тэныд эз ковмы 77-ысь копыртчывлыны 77 черешня тусьла!
Комиӧн гижис
Манова Надежда