МЫЙЛА ТШУПСЬЫСЬЯС ВЕЖА ПЕТЫРӦС ПИНЯЛӦНЫ
Иисус да вежа Петыр бара ветлӧдлӧны му кузя. Ӧтчыд мунӧны вӧлі найӧ корчма дорті дай кылӧны, мый сэні тшупсьысьяс гажӧдчӧны. Петырлы зэв окота лои видзӧдлыны, кыдзи найӧ сэні гажӧдчӧны. А Иисусыд сылы сӧмын шуис:
— Петыр, эн мун сэтчӧ, сэні тэнӧ нӧйтасны.
Но Петыр эз кывзысь дай пырис корчмаӧ. Иисусыд гӧгӧрвоис, мый Петырӧс он ӧлӧд дай ӧвсис сыысь: медым мунӧ, кытчӧ кӧсйӧ!
Ӧтитор сӧмын Иисусыд вӧчис — ӧшӧдіс Петырлы мышкас контрабас, а ачыс водзӧ муніс аслас туйӧд.
А тшупсьысьяс гажӧдчӧны, мый вынсьыныс гажӧдчӧны! Аддзисны найӧ контрабастӧ — сэки ставыс и пансис! Чиган пыдди найӧ Петыртӧ пуктісны да, пырысь-пыр и тшӧктісны сылы ворсны. А Петырыд пыксьӧ, абу пӧ ме чиган, ворсны контрабас вылын ог куж. Но тшупсьысьяс кивыль эз вартны. А Петыр пыр пыксьӧ. Сёысь нин пиняліс асьсӧ, мый пырис тшупсьысьяс дінӧ. Кӧсйис кыдзкӧ бурӧн мынтӧдчыны наысь, да некыдз оз вермы. Бӧръявыв тшупсьысьяс дӧзмисны да сёрнитчисны Петыртӧ нӧйтны, да сьӧлӧмсянь!
Петырыд, кор аддзис, мый унакодь тшупсьысьыд чукӧрмис, — ӧдйӧ усйысис, котӧртіс Иисус бӧрся.
А Иисусыд матыстчӧ нин вӧлі мӧд сикт дорӧ. Петырыд ӧдва и суӧдіс Иисустӧ, норасьны кутіс, мый сыкӧд лои.
Иисусыд та вылӧ сӧмын шуис:
— Ме ӧд тэныд, Петыр, шулі: эн мун сэтчӧ!
Но Петыр оз вермы инасьны, пыр мӧвпалӧ: кыдзи эськӧ тшупсьысьяслысь водзӧс перйыны. Юаліс сійӧ Иисуслысь, мый вылӧ пӧ тшупсьысьяс скӧралӧны уджаліганыс. Иисусыд вочавидзис: скӧралӧны пӧ найӧ сэки, кор веськалӧ налы ув туя кер.
А Петырлы сӧмын тайӧ и колӧ: слабог, тӧдмаліс, мый сылы колӧ. И кутіс сійӧ дзайгӧмӧн корны Иисустӧ, медым сійӧ став пуӧ увъяс сутшкаліс. Да медым увъясыс вӧліны кӧртысь, медым эськӧ тшупсьысьяс эз вермыны увъяссӧ перъявны пуясысь. А кӧсъясны кӧ кӧрт увъяссӧ перъявны, медым эськӧ став черыс налӧн жугалас. Но тайӧ вӧлі зэв нин вывті да Иисусыд та вылӧ эз мун. Но медым и тшупсьысьясӧс велӧдны, и медым Петырлӧн сьӧлӧмыс бурмис, — быд пуӧ Иисус сутшкаліс увъяс, сӧмын — пуысь жӧ. А ӧд увъясыд абу ӧткодьӧсь, эмӧсь и вывті чорыдӧсь. И со сэки, кор тшупсьысьяслы веськалӧ сэтшӧм чорыд ув, найӧ пыр Петырӧс пинялӧны, ӧд тӧдӧны, кодӧс колӧ ошкыны таысь.
Комиӧн гижис
Манова Надежда