ИИСУС ДА ВЕЖА ПЕТЫР МУ КУЗЯ ВЕТЛӦДЛӦНЫ
Иисус да вежа Петыр ветлӧдлӧны му кузя ӧтлаын. Ӧтчыд паныдасисны найӧ гӧрыськӧд. Сылӧн вӧлыс вӧлі сэтшӧм ӧдйӧ мунӧ, мый гӧрысьыд весиг оз и удит сы бӧрся. Иисусыд матыстчис вӧв дорас да ӧти коксӧ дойдыштіс. Но гӧрысьыд и ӧні оз су вӧв бӧрся. Иисусыд дойдіс вӧлыслысь и мӧд коксӧ, но гӧрысьыд бара на оз су вӧв бӧрсяыс — сэтшӧм ӧдйӧ ветлӧдлӧ вӧлыс. Дойдіс Иисусыд вӧвлысь и коймӧд коксӧ, а сылы — веськодь!
Бӧрыннас нин и нёльӧдсӧ Иисусыд дойдіс. Сӧмын сэки гӧрысьыд вермис лючки мунны вӧв бӧрсяыс.
Гӧрысьыд горӧдіс вӧлыслы: — Эй!
Вӧлыс сувтіс, а сэсся нин пондіс мунны ньӧжйӧник.
— Аддзан, Петыр, — шуӧ Иисус, — мортыс ӧні нин суӧ вӧв бӧрсяыс, а ӧд водзджык оз вӧлі су. Эг кӧ эськӧ дойд вӧлыслысь кокъяссӧ, сійӧ вермис эськӧ уна лёктор вӧчны месайыслы.
Видзӧдлісны найӧ мӧдар бокӧ. А сэні ӧти морт гӧрис жӧ, сӧмын нёль ӧшкӧн. Гӧрысьыс сэтшӧм ёна найӧс тэрмӧдліс, мый ӧшъясыс весиг кывъяснысӧ ӧшӧдӧмаӧсь.
— Нолы виччысьлы, Петыр, час ӧти гӧрысь кутас шойччыны!
Дзик виччысьтӧг гӧр, мусӧ бергӧдіг, лэптіс биа из, каллян да табак. Гӧрысь ставсӧ чукӧртіс, дерт, ӧшъясыс сэккості шойччӧны. Сэсся гӧрысьыд пондіс куритчыны, а ӧшъяс бара на шойччӧны.
— Аддзан, Петыр, и коньӧр гӧрысьлы шойччӧг колана. Сэсся и мукӧдъясыс шойччыштасны.
Мунӧны Иисус да Петыр водзӧ. Друг Петырлы юрас мӧвп воис: окота лои сылы кӧть ӧти лун Енмӧн лоны. Ок, и петкӧдлас нин сійӧ, кыдзи колӧ юравны му вылас! Иисусыд и шуис сылы та вылӧ:
— Но инӧ, ло!
А стӧч сійӧ кадӧ налы воча локтӧ порсьясӧс видзысь. Пырис сійӧ корчмаӧ, а порсьяссӧ ӧшинь улас колис. Сылысь юалӧны, мый пӧ лоӧ порсьясыскӧд, коді кутас лунтыр найӧс видзны? А порсь видзысьыд сӧмын бротнитіс ныр улас, а Ен пӧ.
— Но, Петыр, кывлін, мый порсь видзысь шуис? Мун, видз порсьяссӧ.
Но мый вӧчан! Ковмис Петырлы порсь видзысьӧн лоны. Ковмис сылы котравны порсьяс бӧрся, ноксьыны накӧд — дзонь лун! Ок, кутшӧма радліс ина порсь видзысьыд, кор корчмаысь петігас аддзис ассьыс порсьяссӧ. Сэсся и нуӧдіс найӧс гортас. А Петыр ӧдва кок йылас сулалӧ мудзӧмысла. Иисус и шуӧ сылы:
— Петыр, тэ ӧд дзонь лун эн Енмӧн вӧв, а порсь видзысьӧн!
