ВЕЖА ПЕТЫРЛӦН МАМЫС

Ӧтчыд вежа Петыр пондіс элясьны Енлы, мый мамыс сылӧн абу райын. Ен сылы и шуӧ:

— А ме тэнад мам йывсьыд нинӧм буртор эг аддзывлы некутшӧм небӧгъясын, некутшӧм гижӧдъясын.

— Но ӧд буртор сійӧ вӧчис! Сійӧ сетіс гӧль йӧзлы капуста мач!

Сэки Ен судзӧдіс ӧти капуста кор дай сетіс сійӧс Петырлы:

— Со капуста кор! Сы вылын и катӧд мамтӧ райӧ.

Петыр босьтіс капуста корсӧ да шуис мамыслы, медым сійӧ ёна кутчысяс капуста корас.

А тайӧс аддзылісны да кылісны мукӧд ловъяс. Пондісны найӧ ставныс ӧтпырйӧ писькӧдчыны Петыр мам дорас да кватлавны паськӧмӧдыс. А пӧчыд наысь мынтӧдчӧ, полӧ: капуста корйыд ставсӧ оз вермы кутны.

Пӧчыдлӧн мый вынсьыс ловъястӧ йӧткалігад капуста корйыд и косяссис.

Петырыд матыстчис Ен дінӧ дай висьтасис, мый лои. Енмыд и шуӧ:

— Эз кӧ вермы нин и капуста корйыс сійӧс кутны, сідзкӧ, медым сэні и кольӧ.

Сідз со ӧнӧдз на вежа Петырлӧн мамыс и абу енэжын.