МАТЯШ КОРОЛЬ ДА ВӦР ПӦРӦДЫСЬ
Ӧтчыд пӧрысь пӧрӧдчысь вӧрын уджаліс. Пусӧ пӧрӧдіс, а мырнас вель дыр ноксьӧ: мусьыс некыдз кыскынысӧ оз вермы. Ёна и мудзис. Пуксис мыр вылас дай пондіс пинявны Адамӧс да Еваӧс: эз кӧ пӧ сёйны гуся яблӧксӧ, эз эськӧ найӧс вӧтлыны райысь да ӧні пӧ эськӧ меным эз ковмы ноксьыны тайӧ мырнас.
А буретш тайӧ каднас сэні жӧ вӧраліс Матяш король. Кыліс сійӧ, кыдзи мортыд видӧ Адамӧс Евакӧд. Нюмъёвтӧмӧн мыйкӧ мӧвпыштіс да петіс пуяс сайсьыс вӧр пӧрӧдысь дінӧ:
— Чолӧм, бур морт! Видзӧда, тэнӧ кутшӧмкӧ неминуча суӧма. Тӧдан мый? Мунам мекӧд, менам крепость эм, верман сэні овны, шойччӧдны мудзӧм лысьӧмтӧ. А кажитчас кӧ, и кувтӧдзыд сэні верман овны.
Вӧр пӧрӧдысьыдлы кажитчис Матяшлӧн мӧвпыс да муніс радпырысь.
Воисны крепостьӧ. Корольыд и шуӧ:
— Кесйылӧсъяслы тшӧкта, медым дӧзьӧритісны тэнӧ, бура видзисны, медым тэ некутшӧм тӧжд эн тӧдлы. Уджавны тані тэныд оз ковмы. Мый кӧсъян — ставсӧ тэныд ваясны, ставсӧ вӧчасны. Со тэныд куим жыр, татчӧ и овмӧдчы, а нёльӧд жыръяс эн пыр: сэтчӧ оз позь.
А ачыс корольыд нёльӧд жыръяс водзвыв нин пыралӧма дай пӧрӧдчысьтӧ испытайтӧм могысь мыйкӧ гусьӧн лӧсьӧдӧма.
Вӧр пӧрӧдысьлӧн зэв бур олӧм лои: ставсӧ сылы вӧчӧны, вердӧны-юкталӧны, уджавны оз ков — лунтыр кыккирудз пукав. Кань олӧм дай и сӧмын!
Но кань олӧмыд — сійӧ каньяслы, а вӧр пӧрӧдысьыдлӧн и татшӧм олӧм дырйи юрас мӧвпъяс чужӧны. Зэв окота лои сылы тӧдмавны, кутшӧм гусятор нёльӧд жыръяс, мыйла сэтчӧ пырны оз позь.
— Час жӧ пырала, син пӧлӧн сӧмын и видзӧдла. Ӧдзӧсыс абу томана да, некод оз и казявлы.
Сідзи и вӧчис. Нёльӧд жыръяс некод эз вӧв. Жыр шӧрас сулаліс мича пызан. Пызан вылас ӧти тасьті мӧдӧн тупкӧма.
Пӧрысьыдлӧн синъясыс ӧзйисны, инас оз ӧшйы: сэтшӧма сылы телепит видзӧдлыны, мый сэні тасьтіяс пытшкас. Матыстчис пызан дорас, видзчысьӧмӧн эськӧ и лэптыштіс вылысса тасьтісӧ, а сэтысь шыр пыр и уйкнитіс. Пӧрысьыд, дерт, повзис, кӧсйис эськӧ бӧр, кыдзи вӧлі, пуктыны тасьтіяссӧ, да повзьӧмысла легысь кинас ӧти тасьтісӧ и уськӧдіс мӧд вылас — кыкнан тасьтіыс жугаліс. Кыкнан тасьтіыс жугаліс, шырыд пышйис. Мый вӧчны? Петіс пӧрысьыд гуся жырсьыд, бан бокыс ӧзйӧ. Дзикӧдз шогӧ усис.
Матяш корольыд, дерт, ставсӧ тӧдмаліс да ас дінас сійӧс и корис:
— Аддзан, кӧть тэ и пӧрысь нин, но и тэ эн вермы кутчысьны, тэныд тшӧтш окота лои тӧдмавны гусяторсӧ. А ӧд тэныд крепостьын ӧнӧдз зэв бура овсис. Но ӧні тэныд ковмас бӧр мунны вӧрӧ. Водзӧ Адамӧс да Еваӧс эн нин вид.
И вӧр пӧрӧдысь сьӧкыда ышловзис да надзӧникӧн мӧдӧдчис аслас мыр дінӧ.
