МАТЯШ КОРОЛЬ ДА ПУ САДИТЫСЬ ПӦЛЬ

Ӧтчыд Матяш король ассьыс государствосӧ кытшовтігӧн аддзис пӧрысь пӧльӧс, коді вӧлі садитӧ пу.

— Кодлы тэ тайӧ пусӧ садитан? — юаліс король пӧльлысь. — Тэ ӧд он нин удит босьтны урожайсӧ сы вылысь.

— Но ме лача кута, — вочавидзис гӧль морт, — енмыс кӧ сетас, и ме на видла тайӧ пу вывсьыс урожайсӧ. А оз кӧ удайтчы, внукъяслы коляс дай.

— Гашкӧ, и збыль тэ ногӧн! Сідзкӧ и ме эськӧ тшӧтш кӧсйи чӧсмасьыштны, — шуис Матяш король. — Кор воас медводдза урожайыд, вай и меным видлыны, Буда дворецӧ.

Сэки сӧмын гӧгӧрвоис пӧльыд, мый сы водзын вӧлі ачыс Матяш король. Пӧрччис юрсьыс шапкасӧ, кӧсйис копыртчыны, да корольыд ылын нин вӧлі.

Уна ли, этша ли кадыс колис, а сӧмын пуыд быдмис ыджыд да мича дай сетіс медводдза урожай. Радлӧ пӧль, мый мойвиис сылы и урожай виччысьны, и корольӧс чӧсмӧдны. Бӧрйис куим медыджыд да медмича груша дай мӧдӧдчис король дорӧ. Воис пӧльыд Будаӧ, а сійӧс дворецад оз лэдзны. Пӧль висьталіс стражникъяслы, мый кӧсйысьліс корольлы чӧсмӧдны сійӧс грушаӧн да со и нуӧ сылы. Стражникъяс шӧпкӧдчыштісны дай и шуӧны:

— Ладнӧ, лэдзам ми тэнӧ, сӧмын юксян кӧ миянкӧд грушанад.

Мый вӧчны пӧльыдлы? И гӧль мортлы ковмис сетны стражникъяслы кык груша.

А став тайӧ сёрнисӧ Матяш корольыд вывсяньыс и аддзылӧма, восьса ӧшинь дорас слӧймӧма да.

Сідзи пӧльыд и вайис корольлы сӧмын ӧти груша. Корольыд аттьӧаліс пӧльтӧ козинсьыс дай шуӧ:

— Час жӧ ме мынтыся грушасьыд, — дай чужӧмбанас куимысь кокньыдика кучкис.

Пӧльыд гыжйыштіс балябӧжсӧ дай бӧр мӧдӧдчис, а дворецсьыс петігас мӧвпалӧ:

— Час жӧ и ме мынтыся грушасьым, — да сэтшӧма кыкысь сетӧбтіс стражникъяслы пель боканыс, мый налӧн шапкаясныс лэбзисны юрсьыныс.

А Матяш корольыд вывсяньыс ставсӧ тайӧс бара аддзыліс дай сьӧлӧмсяньыс ёна и сераліс горш стражникъяс вылас. Сэсся тшӧктіс бергӧдны мудер пӧльӧс да озыра козьналіс сійӧс.