ОСЁЛ — ПОВОДДЯ ТӦДЫСЬ
Ӧтчыд Матяш король пондіс дасьтысьны туйӧ: кад нин вӧлі бара кытшовтны ассьыс государствосӧ, видзӧдлыны, ставыс-ӧ лючки. Юаліс аслас поводдя тӧдысьлысь, кыдзи сылы пасьтасьны, зэрас али оз. Поводдя тӧдысь вочавидзис сылы, смела пӧ верман мунны, оз зэр.
Мӧдӧдчис Матяш туйӧ. Мыйкӧ мында муныштіс, а муніс сійӧ подӧн, друг аддзӧ: кымрасьны кутіс. А неылын ыжъяс йирсисны. Матыстчис Матяшыд ыж видзысь дорӧ да и юасьӧ, зэрас али оз?
— Видзӧд, менам осёлӧй горзӧ, мусӧ кокъяснас лёкысь парсалӧ, — сідзкӧ, зэрас.
И збыль, пырысь-пыр и зэрмис да ведраысь моз пондіс кисьтны. Матяшыд брӧд ва кӧтасис.
Кор Матяш корольыд бӧр воис гортас, Буда крепостьӧ, корис ас дорас поводдя тӧдысьӧс да крапкис-шуис сылы:
— Поводдя тӧдысьӧй — осёл, а осёл — поводдя тӧдысь!
Комиӧн гижис
Манова Надежда