КУПАЛЬНИЧА ЛУНӦ

Купальнича лунӧ
Шогӧй менам вунӧ.
Керӧс бокӧ кая,
Небыд корӧсь вая.

Небыд-небыд корӧсь
Гажа керӧс дорысь.
Содта купальнича,
Лоас зэв ӧд мича.

Пывсян сэсся ломта,
Ёна сійӧс шонта.
Коя изъяс вылас,
Медым горйыс сьылас.

Сывдас менӧ корӧсь
Гажа керӧс дорысь.
Лоа чӧскыд кӧра,
Кыдзи пуыс вӧрас.

Берег вылӧ пета,
Валы шудӧс сета.
Кывтас мича корӧсь
Менам берег дорысь.

Кывтас сійӧ ылӧ,
Гашкӧ, мусюр йылӧ,
Кытчӧ шонді волӧ,
Кӧні муса олӧ.