* * *

Юыс кытчӧкӧ менӧ кылӧдӧ,
Пыжам берегыс зарни гылӧдӧ.
Тӧдса ластаыс, тӧдса вомыныс,
Тӧдса пелысьыс визув вомӧныс.

Эстӧн коркӧ ми тэкӧд юрасим,
Томӧсь вӧлім да, ӧдйӧ бурасим.
Эстӧн сэтӧрсӧ вомӧ сюялім,
Баддьӧд-эжӧрӧд ёна уялім.

Эстӧн окасим, эстӧн лӧсялім,
Ытшкӧм-куртӧмысь ёнджык пӧсялім.
Ӧні мӧдъяс нин талань волӧны,
Биа-бордаӧсь тадз жӧ лолӧны.

Юыс кытчӧкӧ менӧ кылӧдӧ,
Пыжам берегыс зарни гылӧдӧ.
Мед и кылӧдас, мед и лэччӧдас,
Аслам томлунӧ менӧ чеччӧдас.