ПЕЛЫСЬ БИ

Еджыд енэж еджыд эрдӧ
Кисьтӧ еджыд лым ли бус.
Пелысь биыс потшӧс бердын
Весиг турӧбысь оз кус.

Кыа рӧма жоньяс сэні
Шонтысьӧны кузь лунтыр.
Кӧнкӧ, виччысьӧны менӧ,
Эг нин ветлы бура дыр.

Еджыд кыа вӧр-пу йылын
Эз на аддзысь рытыскӧд.
Мыйкӧ лӧсьыд сьӧлӧм вылын,
Мыйла, ачым ог и тӧд.

Еджыд енэж еджыд эрдӧ
Дыр на кисьтас лым да бус.
Шонтысь менам сьӧлӧм бердын,
Биыс некор сэсь оз кус.