ВАСЬЛӦН ГӦТЫРЫС ЗЭВ ТОМ

Васьлӧн гӧтырыс зэв том
Да зэв мича.
Мед эз курччы сійӧс ном,
Гортас видзӧ.

Зонъяс, клубӧ мунігмоз,
Шутьлялӧны.
Медым коляс шоныд поз,
Ылӧдлӧны.

Ок и гажа ывла выв,
Гӧгӧр сьылӧ.
Чуксасьӧмсӧ мича ныв
Бура кылӧ.

Дзик тай сійӧ вӧлӧм йӧй,
Збыль ӧд тайӧ:
Татшӧм томӧн петан мӧй
Верӧс сайӧ?

Кӧсъян эськӧ, да он лэб
Гудӧк горас.
Зарни чунькытштӧ он дзеб
Визув шорас.

Ок и гажа ывла выв,
Гӧгӧр сьылӧ.
Чуксасьӧмсӧ мича ныв
Бура кылӧ.