МЫЙКӦ СЬӦЛӦМ ДІНӦС БЫТШКӦ

Мыйкӧ шӧри потӧ юрӧй,
Овны ньӧти мен оз сет.
Код нӧ муӧс гӧрысь сюрас,
Эз на эжмы сійӧ мед?

Мыйкӧ сьӧлӧм дінӧс бытшкӧ,
Кӧть эг видлы вина-сур.
Код нӧ меным видзсӧ ытшкас,
Эз на лым улӧ мед сюр?

Мыйкӧ морӧс пытшкӧс сотӧ,
Кыткӧ доймӧ менам пыр.
Кодлы менам пескӧй потӧ,
Эз на медым кӧдзав жыр?

Мыйкӧ бура дыр нин вися,
Мыйкӧ дыр нин меным лёк.
Кодкӧ регыд волас, мися,
А со некоді оз лок.