* * *

Сэк вӧлӧксӧ вуджи ме кузьӧс
И мунӧмсьыс лои кор пӧт,
Вӧр керкаын мыйтакӧ узи
Да вӧталі со кутшӧм вӧт.

Ми быттьӧкӧ вотчыны мунім,
И вуджим кор егыр да нюр,
Тэ кытчӧкӧ ру пиас сунін
Да некыдзи меным эн сюр.

Став чӧртсӧ и мутисӧ ёри,
Став пуыслысь лэптылі вез,
Ме Енмыслысь бӧрдӧмӧн кори,
Мед вайӧдіс тэнӧ, но эз...

Ог эскы ни вӧтлы, ни рулы,
И вежӧрӧй ёльыс кодь сӧдз,
Но сэксянь, кор вӧрынӧсь, шула,
Мед бокӧ и воськов эн вӧч.