* * *

И менӧ весиг грекӧ вӧйтысь карас,
Кор ӧшинь саяд дзодзӧг бордлӧн сер,
Тэ, кӧнкӧ, ӧтнад пукалан, Тамара,
Да кывзан, кыдзи сяльӧдыштӧ зэр.

И менӧ весиг грекӧ вӧйтысь карас
Оз, кӧнкӧ, ёна серам тэнад пет:
Ӧд регыд вӧлі тэкӧд шань да варов
И сьӧлӧм кӧсйи сетны, да эг сет.

И менӧ весиг грекӧ вӧйтысь карас,
Кор ӧшинь увсьыд чаштӧ тополь вож,
Тэ, кӧнкӧ, тувсов лунсӧ казьтан бара
И чайтан, мый эг дзикӧдз вылӧ вош.

И менӧ весиг грекӧ вӧйтысь карас
Оз тэныд коктӧ шонтысьыс на ков:
Тэ менӧ век на радейтан, Тамара,
И дыр на тадзи, дыр на тадзи ов.